တောင်ကိုရီးယား နိုင်ငံသို့ EPS စနစ် ဖြင့် အမျိုးသမီး လုပ်သားအပါအဝင် မြန်မာလုပ်သား ၁၂၄ ဦး ကို မတ်လ၁၉ရက် စေလွှတ်ခဲ့တယ်လို့ ကိုရီးယားနိုင်ငံဆိုင်ရာမြန်မာသံရုံးရဲ့ ထုတ်ပြန်ချက်အရသိရပါတယ်။

အစိုးရပြည်ပအလုပ် အကိုင်အေဂျင်စီ (POEA) မှတစ်ဆင့် EPS စနစ်ဖြင့် စေလွှတ်တဲ့ မြန်မာလုပ်သားသစ် တွင် ကုန်ထုတ်လုပ်သား ၅၈ ဦး၊ သစ်တောလုပ်သား ၂၅ ဦး၊ ဆောက်လုပ်ရေးလုပ်သား ၁၉ ဦး ၊ဝန်ဆောင်မှုလုပ်သား ၇ ဦး (အမျိုးသမီး ၁ ဦး) နဲ့ စိုက်ပျိုး/မွေးမြူရေးလုပ်သား ၁၅ ဦး စုစုပေါင်း လုပ်သားသစ် ၁၂၄ ဦးဖြစ်တယ်လို့ သိရပါတယ်။

ဝန်ဆောင်မှု လုပ်သား အဖြစ် သွားရောက်တဲ့ အမျိုးသမီး လုပ်သားမှာ မြန်မာနိုင်ငံမှ EPSစနစ်ဖြင့် ပထမဆုံး တောင်ကိုရီးယား နိုင်ငံကို သွားရောက် အလုပ် လုပ်ကိုင်ခွင့်ရရှိသူဖြစ်တယ်လို့ သိရပါတယ်။

၂၀၂၅ ခုနှစ် အတွင်း တောင်ကိုရီးယားနိုင်ငံသို့ EPSစနစ်ဖြင့် မြန်မာလုပ်သားစေလွှတ်မှု မှာ ယခုအကြိမ် အပါအဝင် ၃ကြိမ်ရှိပြီ ဖြစ်ပြီး လုပ်သားဦးရေ ၄၀၀ကျော်စေလွှတ်ခဲ့တယ်လို့ သိရပါတယ်။

တောင်ကိုရီးယား နိုင်ငံအနေနဲ့ ယခုနှစ် အတွင်း မြန်မာအပါအဝင် နိုင်ငံခြားသား လုပ်သား ၂၀၀၀၀ ကျော် ခေါ်ယူဖို့ စီစဉ်ထားကြောင်း ကိုရီးယားသတင်းတွေအရ သိရပါတယ်။