တရုတ်ပြည်သူ့သမ္မတနိုင်ငံ အစိုးရကပြစ်မှုဆိုင်ရာ ဥပဒေ၊ ငြိမ်ဝပ်ပိပြားရေး ဥပဒေ၊ ကွန်ရက်လုံခြုံရေး ဥပဒေ အစရှိတဲ့ သက်ဆိုင်ရာ ဥပဒေစည်းမျဉ်းစည်းကမ်း သတ်မှတ်ချက်အရ နယ်စပ်ဒေသတွေ အပါအ၀င် နိုင်ငံအတွင်း VPN အသုံးပြုခြင်းကို တင်းကြပ်စွာ တားမြစ်ထားတယ်လို့ ကြေညာချက်တွေ အရ သိရပါတယ်။
အဆိုပါ ကြေညာချက် ကို တရုတ်နိုင်ငံအတွင်းရောက်ရှိနေတဲ့ မြန်မာနိုင်ငံသားတွေပါသိစေဖို့ တရုတ် မြန်မာ နှစ်ဘာသာ ဖြင့် ထုတ်ပြန်ကြေညာ ထားပါတယ်။
ကြောညာချက်မှာတော့ VPN App သည် တရုတ်နိုင်ငံ၏ တရားဝင် ထိန်းချုပ်မှုကို ကျော်လွန်ပြီး သက်ဆိုင်ရာ နိုင်ငံရပ်ခြား ရှိ Web page သို့မဟုတ် Website က အကြောင်းအရာများ ကို ရှာေဖွကြည့် ရှုနိုင်တဲ့ တရားမဝင်သော App ဖြစ်တယ်လို့ ဖေါ်ပြထားပါတယ်။
မည်သည့်အဖွဲ့အစည်း သို့မဟုတ် လူတစ်ဦးချင်းကခွင့်ပြုချက်မရှိပဲ နိုင်ငံတကာကို ချိတ်ဆက်နိုင်တဲ့ အဆိုပါ VPN App အသုံးပြုမှုကို တရုတ်နိုင်ငံ အစိုးရက တင်းကြပ်စွာ တားမြစ်ထားကာ တရားမဝင်ကြောင်း ထုတ်ပြန်ချက်ထဲ မှာ ရေးသားထားပါတယ်။
'' တရုတ်ပြည်မှာ က တရားဝင်ပဲ ဖြစ်ဖြစ် တရားမ၀င်ပဲ ဖြစ်ဖြစ် မြန်မာလူမျိုး သိန်းနဲ့ ချီ ရှိတယ်၊ ယူနန်မှာသာမက ဟိုပေ အရှေ့မြောက်ပိုင်းဒေသ မှာ အများကြီးပဲ ဒါကြောင့် ထုတ်ပြန်တားမြစ် ချက် ကို သိအောင် တရုတ် အစိုးရက
တရုတ်၊ မြန်မာ နှစ်ဘာသာ နဲ့ ထုတ်ပြန်ပေးတာ မကြာခင်မှာလဲ တယ်ဟုန်ဒေသမှာမြန်မာအလုပ်သမားတွေ ကို တရားဝင်အလုပ်လုပ်ခွင့်ပေးဖို့လဲရှိတယ်ဆိုတော့ ရောက်နေတဲ့မြန်မာနိုင်ငံသားတွေကော အသစ်ထပ်လာမယ်သူတွေကော အခုကြေညာချက်ကိုအထူးသတိထားဖို့လိုတယ်''ဟု တရုတ်ပြည်နယ်စပ် တွင် အလုပ်လုပ်ကိုင်နေတဲ့ မြန်မာနိုင်ငံသား တစ်ဦးက ပြောပါတယ်။
အဆိုပါတားမြစ်ထားတဲ့ တရားမဝင် VPN App ကိုအသုံးပြုတဲ့ မည်သူမဆို ဒဏ်ကြေးငွေ ယွမ် ၁၅,၀၀၀ အထိ ပေးဆောင်ရမှာဖြစ်ပြီး တရားမဝင်လို့ ယူဆရသည့် ဝင်ငွေများကို သိမ်းယူသွားမည်ဖြစ်ကြောင်း၊ မှားယွင်းသောမှတ်ချက်များ၊ ဗီဒီယိုများနှင့် ကောလဟာလ သတင်းအမှားများ ကို ကြည့်ရှုရန်နှင့် ဖြန့်ဝေရန် အတွက် VPN App ကိုလက်ကိုင်ဖုန်းတွင် အသုံးပြုလျှင် ဥပဒေအရ အပြစ်ပေးခံရ မှာ ဖြစ်ကြောင်း ထုတ်ပြန်ချက် မှာ ဖေါ်ပြထားပါတယ်။
ထပ်မံသတိပေးထားတာကတော့ ကိုယ်ရေးကိုယ်တာအသုံးပြုမှု ဒေါင်းလုဒ်ဆွဲခြင်းနှင့် VPN မိုဘိုင်းအက် ကို ရောင်းချခြင်း စတဲ့ လုပ်ဆောင်ချက်တွေကို ဆောင်ရွက်ပါက တရုတ်ပြည် ရဲဌာနတရားဥပဒေအရ ပြင်းထန်စွာ အပြစ်ပေး အရေးယူသွားမှာ ဖြစ်တယ်လို့ ထုတ်ပြန်ထားပါတယ်။
တရုတ်နိုင်ငံမှာသာမက မြန်မာနိုင်ငံမှာလည်း အာဏာသိမ်းအစိုးရက လူမှုကွန်ယက်အချို့ နဲ့ VPN App တွေကို ပိတ်ပင်တားမြစ်ထားသလို ဇွန်လမှာတော့ VPN App တွေကို စက်မှုဇုန်ဧရိယာက အလုပ်သမားတွေထံ လိုက်လံစစ်ဆေးတာတွေ ပိတ်ပင်ရန်ကြိုးပမ်းမှုတွေကြောင့် လူမှုကွန်ယက်တွေသုံးစွဲရာမှာအခက်အခဲတွေဖြစ်ပေါ်နေတာဖြစ်ပါတယ်။
