အလုပ်သမားတွေဆီက စံချိန်တွေတိုးတောင်းပြီးတော့ စံချိန်မပြည့်ဘူးဆိုတဲ့အကြောင်းပြချက်နဲ့တနဂ်နွေရုံးပိတ်ရက်ကိုပါအိုတီကြေးမပေးဘဲ ဆင်းခိုင်းနေတဲ့အတွက် Myanmar Jiale Fashion Garment အထည်ချုပ်စက်ရုံကအလုပ်သမားတွေအခက်တွေ့နေရတယ်လို့သိရပါတယ်။
အဆိုပါအထည်ချုပ်လုပ်ငန်းဟာ တရုတ်လူမျိုးပိုင်ဆိုင်တာဖြစ်ပြီးတော့ ချင်းတွင်လမ်း၊ ရွှေသံလွင်စက်မှုဇုန်၊ လှိုင်သာယာမြို့နယ် မှာလုပ်သားဦးရေ ၁၀၀၀ ဝန်းကျင်နဲ့လည်ပတ်လုပ်ကိုင်နေတဲ့လုပ်ငန်းတခုဖြစ်တယ်လို့ သိရပါတယ်။
"စက်ရုံကအလုပ်သမားတစ်ဦးချုပ်လုပ်နိုင်တာထက် စံချိန်တွေတောင်းတယ် အလုပ်သမားတွေကိုတောင်းတဲ့ စံချိန်မပြည့်ရင်တနဂ်နွေနေ့မှာ OT အလကားဆင်းခိုင်းတယ် အရင်ကဆို အထည်က(၄၀)ရာခိုင်နှုန်းပဲချုပ်ရတယ် အခုဆို(၆၀)ရာခိုင်နှုန်းချုပ်ပေးနေရတယ်"လို့ အလုပ်သမားတွေဖက်ကပြောပါတယ်။
Myanmar Jiale Fashion Garment အထည်ချုပ်စက်ရုံဖက်ကစံချိန်ကအရမ်းတောင်းတာများပြီး အထည်ကြေးကိုအရင်က(၁၀၀)ရာခိုင်နှုန်းပေးပေမယ့် ယခုအခုအခါမှာတော့ ကြေး(၆၀)ရာခိုင်နှုန်းပဲပေးတော့တဲ့အတွက် အထည်အရေတွက်များများပေးရပြီးအထည်ကြေးရတာနည်းသွားတယ်လို့အလုပ်သမားတွေရဲ့ပြောဆိုချက်အရသိရပါတယ်။
စစ်အာဏာသိမ်းပြီးနောက်ပိုင်း စစ်တပ်ကလုပ်ငန်းရှင်တွေနဲ့ပေါင်းပြီးသမဂ္ဂ တွေကိုဖြိုခွဲတာသမဂ္ဂ ခေါင်းဆောင်တွေကိုဖမ်းဆီးတာတွေကြောင့် စက်ရုံမှာအလုပ်သမားသမဂ္ဂရှိပေမဲ့ပေါ်ပေါ်လွင်လွင်လုပ်ခွင့်မရတော့တဲ့ အတွက်အလုပ်ရှင်တွေဖက်ပဥပဒေမဲ့ပုံစံအမျိုးမျိုးချိုးဖောက်နေတာတွေရှိနေတာလို့အလုပ်သမားတွေကပြောပါတယ်။
Myanmar Jiale Fashion Garment အထည်ချုပ်စက်ရုံဟာ H&M အမှတ်တံဆိပ်အထည်များချုပ်လုပ်ကာစျေးကွက်ကိုပြန်လည်တင်ပို့ရောင်းချနေတဲ့စက်ရုံတခုလဲဖြစ်ပြီးအလုပ်သမားတွေဖက်ကတော့ယခုလိုအိုတီကြေးမပေးပဲခိုင်းနေတာတွေ စံချိန်မတရားတိုးပေးနေတာတွေကိုရပ်တန့်ပေးဖို့လိုလားနေကြတယ်လို့သိရပါတယ်။
