စစ်တပ်က အာဏာသိမ်းပြီးနောက်ပိုင်း တစ်နှစ်အတွင်းမှာ ဧရာဝတီတိုင်း ပုသိမ်စက်မှုဇုန်က အထည်ချုပ်စက်ရုံတစ်ရုံ ယာယီရပ်နားခဲ့ရပြီး ကျန်စက်ရုံများတွင်လည်း အလုပ်သမားဥပဒေများကိုပေါ်ပေါ်တင်တင်ချိုးဖောက်လာကြတယ်လို့ အလုပ်သမားတွေထံကသိရပါတယ်။
"အာဏာသိမ်းတဲ့ချိန်ကစလို့ကျွန်မတို့အလုပ်သမားတွေ အလုပ်သွားအလုပ်ပြန်ချိန်တွေဆို သူတို့က သေနပ်ကြီးတကားကားနဲ့မူးရူးနေတာ အဆောင်ပြန်တဲ့ချိန်တွေဆိုလည်း ရိသဲ့သဲ့ပြောတာတွေ ရှိတယ် ။စက်ရုံထဲမှာဆိုလဲ အပြစ်မရှိအပြစ်ရှာအလုပ်ထုတ်တယ်။ဝန်ထမ်းတွေဆန္ဒမပါဘဲ HRကနေ အလှူငွေတွေဖြတ်တယ်။ အထည်စံချိန်တွေဆိုလည်း ဒီနေ့ ၅၀ရရင်နောက်နေ့၆၀တောင်းတယ် မရရင်လီတာတွေကနေဆဲတယ်။ ခွင့်ပေးသင့်တဲ့အခြေနေတွေမှာလဲခွင့်တွေမပေးဘူး။ ဥပဒေပါခွင့်တွေယူဖို့တောင်အတော်ခက်ခဲတယ်။covidကာလ ၆ပေအကွာလဲမရှိတော့ဘူး ၊လက်ဆေးဆပ်ပြာတွေလဲရှိချင်တဲ့ချိန်မှရှိတယ် အလုပ်ဆင်းချိန်တွေဆိုလည်း ရောထွေးပြီးဆင်းကြတယ် "လို့ လက်ရှိစက်ရုံဆင်းနေတဲ့ဝန်ထမ်းတစ်ဦးကပြောပါတယ်။
အာဏာသိမ်းပြီးနောက်ပိုင်းအလုပ်သမား ၆၀၀၀ ဝန်းကျင်အလုပ်လက်မဲ့ဖြစ်ခဲ့ ရပြီး စားဝတ်နေရေးနှင့် အလုပ်ပြန်လည်ရရှိရန်ခက်ခဲနေကြဆဲ ဖြစ်တယ်လို့ စာရင်းတွေအရသိရပါတယ်။
"စက်ရုံယာယီပိတ်သိမ်းပြီးကတည်းကကျွန်မတို့ အားချင်းမပြန်သေးဘဲ တခြားစက်ရုံတွေမှာသွားလျှောက်တော့လဲမခေါ်ဘူး၊ ရွာပြန်တော့လဲ အလုပ်မရှိတဲ့ အတွက် မိသားစုစားဝတ်နေရေးပါခက်ခဲနေကြရတယ်"လို့အလုပ်ယာယီပိတ်သိမ်းထားသောစက်ရုံမှဝန်ထမ်းတစ်ဦးကပြောပါတယ်။
ဧရာဝတီတိုင်းအတွင်းရှိ ပုသိမ်စက်မှုဇုံတွင် စစ်တပ်မှအာဏာမသိမ်းခင်ချိန်ထိ စက်ရုံ၊ အလုပ်ရုံ( ၈ )ရုံရှိပြီး အလုပ်သမားဦးရေ (၁၅၀၀၀)ဝန်းကျင်အလုပ်လုပ်ကိုင်လျှက်ရှိပြီး မြန်မာနစ်တင်း (သိုးမွှေးအထည်ချုပ်စက်ရုံသည် ၂၀၂၁ခုနှစ်၊ နှစ်ဝက်တွင် အလုပ်ယာယီပိတ်သိမ်းခဲ့ပြီး အလုပ်သမား ၅၀၀၀ ကျော်အလုပ်လက်မဲ့ဖြစ်ခဲ့ပါတယ်။
