အိုမန်မှပေးစာ_၆

 

ဧရာဝတီတိုင်းဒေသကြီး၊ ငပုတောမြို့နယ်၊ ဇီးချိုင်ကျေးရွာတွင် နေထိုင်သူ မှတ်ပုံတင်အမှတ် ၁၄/ဟ ကက(နိုင်)၀၄၅၈၁၄ ကိုင်ဆောင်သူ ကျွန်မ မဟေမာန် သည် တစ်ရွာထဲ နေသူ အသိမှ အိုမန်သို့အလုပ်လုပ်ကိုင်ရန် ဆက်သွယ်ပေးမှု့ဖြင့် အလုပ်လုပ်ကိုင်ရန် အိုမန်သို့ရောက်ရှိလာခြင်းဖြစ်ပါတယ်။

 

ရန်ကုန်မှ ၆လပိုင်း ၉ရက်နေ့ ၂၀၂၅တွင်ထွက်လာခဲ့ပြီး အိုမန်ကို ၆လ ပိုင်း၂၈ ရက်၂၀၂၅ခုနစ်ကရောက်ရှိပါတယ်။

အိုမန်ကအိမ်ရှင်အိမ်ကို ၇လပိုင်း၂၂ရက်နေ့မှာ အလုပ်စဝင်တာဖြစ်ပြီး ၎င်းအိမ်တွင်ဂတ်စ်အိုးကို "မ" လိုက်ပါတယ်။ ထိုသို့ဂတ်စ်အိုး "မ"အပြီးတွင် နောက်ရက်တွင်သွေးတွေ မတရားဆင်းလာပါတယ်။

 

အိမ်ရှင်ကိုအ ကျိုးကြောင်းပြောပြသည့်အခါ အိမ်ရှင်မှဆေးခန်းပြပေးပါတယ်။ ဆေးခန်းပြတာလည်း နှစ်ခါရှိပြီးဆေး သောက်တာလည်းမသက်သာဘဲ ယခုချိန်ထိသွေးကမရပ်တမ်း ပိုပိုဆင်းတာများလာပြီး သားအိမ်ကပါ အောင့်လာပြန်ပါတယ်။

 

ကျွန်မက မြန်မာနိုင်ငံမှာ ခွဲစိတ်မှုကို ခလေးမွေးတုန်းကတစ်ခါ သားအိမ်လက်တံဖြတ် တုန်းကနှစ်ခါလုပ်ထားခံထားရပါတယ်။ အခုလည်းသွေးက မနားတမ်းဆင်းနေသည့်အတွက် မြန်မာပြည်က ခွဲစိတ်ပေးဘူးသော ဆရာဝန်ကိုလှမ်းမေးတော့ ဒီလိုလက္ခဏာဖြစ်နေရင် ဆေးရုံတက်ပြီး ဆေးကုသမှုခံယူရမယ်လို့ ပြောပါတယ်။

 

ဆေးကုသမှုမခံယူဘဲ အလုပ်ဆက်လုပ်နေမယ်ဆိုရင် ဒီထက်အခြေအနေဆိုးလာပြီး သားအိမ်ထုတ် ရတဲ့အခြေအနေရောက်သွားနိုင်တယ်လို့ ဆရာဝန်ကအကြံပြုချက်ပေးပါတယ်၊ အခုလည်း ကျွန်မက သွေးဆင်းတာ လုံးဝမရပ်ဘဲဖြစ်နေပြီး လုံးဝအလုပ်မလုပ်နိုင်လို့ အိမ်ရှင်ဘက်ကလည်း အိုမန်ရုံးကိုပြန်ပို့ထားပါတယ်။

 

အိုမန်ရုံးကိုရောက်တော့ စကားပြန်ကိုဖြစ်ကြောင်းကုန်စင် ကျိုးကြောင်းပြောလိုက်ပြီး အခုလည်းအလုပ် မလုပ်နိုင်တော့ဘဲ မြန်မာပြည်ကိုပြန်ပြီး ဆေးကုသရမယ် အမြန်ပြန်ရမယ်ဆိုတာကို ပြောလိုက်တော့စကားပြန်ကပြန်ချင်ရင် လျော်ကြေးသိန်း ၁၂၀ကျပ် လျော်ကြေးပေးရမယ်လို့ ပြောပါတယ်၊ အိမ်နဲ့ခြံရောင်းပြီးပေးမယ် သိန်း၅၀လောက်ဘဲရမှာ သိန်း၅၀လျော်လို့ရမလားမေးတော့ သိန်း၁၂၀ကျပ်အတိအကျ လျော်ကြေးပေးမှ ပြန်လို့ရကြောင်းပြောပါတယ်။

ကျွန်မရောဂါအခြေအနေ ပိုဆိုးလာရင် ဘယ်လိုလုပ်မလဲမေးတော့ ပိုက်ဆံ လျော်ပြီးပြန်မှရမယ်တဲ့ ရောဂါပိုဆိုးလာရင်လည်း အမကိစ္စပဲတဲ့ တာဝန်မယူပေးနိုင်ကြောင်းပြောပါတယ်။

 

ကျွန်မလည်းသွေးအရမ်းဆင်းပြီး လူကအားပျော့လာပြီးနေထိုင်ရတာ အဆင်မပြေဖြစ်ခြင်းကြောင့် လျော်စ ရာပိုက်ဆံမရှိသည့်အတွက် အကူအညီတောင်းခံခြင်းဖြစ်ပါတယ်။လက်ရှိမှာ ခရမ်းသီး အပုပ်တွေပဲစားရပြီး ဆေးလည်း သောက်စရာမရှိတော့ပါဘူး။ လူက အားနည်းလာပြီး စိတ်တွေလည်း နေလို့မကောင်းဖြစ်နေပါတယ်။ အသက်အန္တရာယ်ရှိတာကြောင့် အမြန်ဆုံးဆေးကုသဖို့ ဆုတောင်းနေရပါတယ်။ မျက်လုံးတဖက်လည်း အောက်က ညိုလာပါတယ်။

ကျွန်မအတော်ကိုအဆင်မပြေနေခြင်း ကြောင့်မြန်မာနိုင်ငံကုန်ထုတ်နှင့် စက်မှုလက်မှု အလုပ်သမားများအဖွဲ့ချုပ် (IWFM) ထံမှတဆင့် အကူအညီတောင်းခံအပ်ပါတယ်။

 

၁။ ကျွန်မ မဟေမာန်သည် ကျန်းမာရေးမကောင်းသည့်အတွက် မြန်မာပြည်ပြန်လိုပါတယ်။

၂။ အိုမန်ရုံးကတောင်းသည့် မြန်မာငွေ သိန်း၁၂၀ကျပ်ကိုတောင်းခံနေခြင်းကို မပေးနိုင်ခြင်းကြောင့် အခက်အခဲဖြစ်နေရပါတယ်။

အကူအညီတောင်းခံသူ