၊ ဆေးခန်းတွေမှာဆေးကုသစရိတ်တွေပိုမိုမြင့်တက်လာတာကြောင့် အခြေခံပြည်သူအများစုဟာ ဆေးကုသစရိတ်မတတ်နိုင်တာကြောင့် အလွယ်တကူရတဲ့ စပ်ဆေး သုံးစွဲတာတွေပိုများလာပါတယ်။
လက်ရှိမှာဆေးဝါးတွေဟာပစ္စည်းပြတ်လပ်တာနဲ့ဈေးနှုန်းမြင့်တက်လာတာတွေကြောင့်စပ်ဆေးတွေလည်းအရင်ကထက်ဈေးတက်လာတယ်လို့သုံးစွဲသူတွေဆီကသိရပါတယ်။
"ဆေးခန်းပြဖို့ကမလွယ်တော့ဘူး။အရင်ကငါးထောင်ကျော်လောက်ကုန်ရင်အခုဆို တစ်သောင်းခွဲလောက်ကုန်တယ်။တော်ရုံလူပြများတဲ့ဆေးခန်းဆိုနှစ်သောင်းလောက်ယူတယ်။တစ်ရက်တည်းပျောက်ရင်တော်သေးတယ်။မပျောက်ရင်အဆင်မပြေဘူးလေ။နောက်သောင်းချီကုန်မှာဆိုတော့စပ်ဆေးလေးပဲအလွယ်ဝယ်သောက်တယ်။ဆေးကောင်းလေးထည့်မှအများဆုံးနှစ်ထောင်လောက်ပေးရတာဆိုတော့အဆင်ပြေသေးတယ်"လို့စပ်ဆေးဝယ်ယူသုံးစွဲနေသူတစ်ဦးကပြောပါတယ်။
စပ်ဆေးအဖြစ် ပေါပေါများများသုံးစွဲနေရတဲ့ Steroid ဆေးတွေဟာ သွေးတိုး၊ ဆီးချို၊ အရိုးပါးအရိုးပွ၊ အဝလွန်၊ အစာအိမ်ရောဂါတွေဖြစ်နိုင်ပြီး အကိုက်ခဲပျောက်ဆေး NSAIDs တွေဟာ အစာအိမ်ရောင် ၊ အူ/အစာအိမ်အနာ၊ အစာအိမ်သွေးကြောပေါက်၊ ကျောက်ကပ်ပျက်တာတွေဖြစ်နိုင်တာကြောင့် အလွယ်တကူမသောက်သုံးသင့်ဘူးလို့ ကျန်းမာရေးဆိုင်ရာ ကျွမ်းကျင်သူတွေက အသိပေးထားပါတယ်။
ဆေးဆိုင်တွေမှာဒီလိုစပ်ဆေးရောင်းချတာဟာတရားဝင်ခွင့်ပြုထားတာမရှိဘဲ တားမြစ်ထားပါတယ်။
အခြေခံပြည်သူတွေကတော့အာဏာမသိမ်းခင်ကတည်းကစပ်ဆေးတွေကိုအသုံးများပြီးအခုချိန်မှာတော့ဝယ်ယူသူပိုများလာတာပဲဖြစ်ပါတယ်။
"ပိုက်ဆံမကုန်အောင်ဆေးရုံသွားပြလို့ပြောပေမယ့်ဆေးရုံမှာလည်းဆေးအကုန်ရတာမဟုတ်ဘူး။ဝယ်ရတာပဲ။နောက်ပြီးအချိန်တွေအကြာကြီးပေးရတာ။ပြောမယ်ဆိုလက်လုပ်လက်စားသမားတွေကျအဆင်မပြေဘူး။အဲဒီတော့ဆေးမြှီးတိုပဲခေါ်မလားအလွယ်ရတာပဲသောက်တယ်"လို့ရွှေပြည်သာမြို့နယ်နေပြည်သူတစ်ဦးကပြောပါတယ်။
ပြည်တွင်းမှာဆေးကုသစရိတ်တွေသိသိသာသာမြင့်တက်လာတဲ့နောက်ပိုင်းမှာအခမဲ့ဆေးရုံဆေးခန်းတွေမှာလည်းကုသလိုသူတွေများလာခဲ့ပြီး ပြည်သူတွေဟာကျန်းမာရေးအတွက်ဆေးဝါးလုံလောက်အောင်မသုံးစွဲနိုင်တဲ့ပြဿာနာကိုရင်ဆိုင်နေရတာပဲဖြစ်ပါတယ်။
"ကျွန်မတို့လည်းစပ်ဆေးမရောင်းချင်ဘူး။ကိုယ်တွေအတွက်လည်းအန္တရာယ်ရှိတယ်။လူနာကဘာဆေးမတည့်တာလဲ။ဘာရောဂါအခံရှိလဲကျွန်မတို့လည်းမသိဘူး။ဒါပေမယ့်စပ်ဆေးမရောင်းရင်အရောင်းအဝယ်ကျတယ်။အခုကဆေးဈေးတွေကတက် အရောင်းကပါးတော့ကျွန်မတို့လည်းအဆင်ပြေအောင်ကြည့်လုပ်နေရတာပါ"လို့ဆေးဆိုင်နဲ့ စတိုးဆိုင်တွဲဖက်ဖွင့်လှစ်ထားသူတစ်ဦးကပြောပါတယ်။
စစ်အာဏာသိမ်းပြီးနောက်မှာ အခြေခံစားသောက်ကုန်၊ လူသုံးကုန်၊ ဆေးဝါးစတာတွေဟာဈေးနှုန်းတွေအဆမတန်မြင့်တက်လာတာဖြစ်ပြီးပြည်သူတွေပိုမိုကြပ်တည်းလာကာ အာဟာရချို့တဲ့တာ၊ စိတ်ဖိစီးမှုများတာနဲ့ လေထုညစ်ညမ်းမှုကြောင့် အဆုတ်အပါအ၀င် ထိခိုက်မှုတွေ ဖြစ်ပေါ်နေပါတယ်။
