ရန်ကုန်မြို့မှာနေအိမ်ငှားရမ်းခတွေအဆမတန်မြင့်တက်လာပြီးနောက်မှာဆိုင်ခန်းငှားရမ်းခတွေပါမြင့်တက်လာတာကြောင့်တစ်နိုင်တစ်ပိုင်အရောင်းဆိုင်လေးတွေ ရပ်တည်ဖို့ အခက်တွေ့နေကြပါတယ်။
လက်ရှိမှာ ဆိုင်ခန်းငှား ရမ်းခတွေဟာမြို့နယ်ရဲ့အချက်အချာကျမှုနဲ့တည်နေရာကိုမူတည်ပြီးအရင်ကထက်နှစ်ဆကျော်မြင့်တက်လာတာပဲဖြစ်ပါတယ်။
"လမ်းမတန်းပေါ်ဆို ၁၀ ပေ ၆၀ ဆိုအနည်းဆုံးသုံးသိန်းခွဲနဲ့လေးသိန်းပေါက်ဈေးရှိတယ်။တစ်ချို့ဟာစပေါ်ငွေကိုသိန်း ၃၀ လောက်ပေးရတယ်လစာကသုံးသိန်းကိုတစ်လချင်းပေး၊ ရေဖိုး၊ မီးဖိုးကသပ်သပ်ပေးရတယ်။တစ်ချို့ကျလည်းစပေါ် မယူဘူး။ လချုပ်၊ ၆ လချုပ် တောင်းတယ်။အခုကအရောင်းအဝယ်တွေပါးတော့သိပ်တော့မကိုက်ဘူး။ဒါပေမယ့်လူပါနေရတော့ထိန်းစားပြီးလုပ်နေရတာပဲ"လို့ ရွှေပြည်သာမြို့နယ်သံဒင်းဈေးနားဆိုင်ခန်းဖွင့်လှစ်ထားသူတစ်ဦးကပြောပါတယ်။
ဒီလိုဆိုင်ငှားရမ်းခတွေမြင့်တက်လာတာကိုရန်ကုန်မြို့ရဲ့အချက်အချာကျတဲ့မြို့နယ်တွေတင်မကဘဲအစွန်အဖျားမြို့နယ်တွေမှာပါရင်ဆိုင်နေရတာဖြစ်ပါတယ်။
အာဏာမသိမ်းခင်ကကျပ်တစ်သိန်းကျော်ရုံသာရှိခဲ့တဲ့ဆိုင်ခန်းငှားရမ်းခတွေကလက်ရှိမှာနှစ်ဆကျော်မြင့်တက်နေပေမယ့်ငှား ရမ်းလိုသူလည်းများနေတယ်လို့သိရပါတယ်။
"အခုကနေရာတိုင်းဈေးတက်တယ်။ကိုယ်ကမိတ်လေးလည်းရနေတော့နေရာကမပြောင်းချင်ဘူး။ဒါပေမယ့်သူ့အတွက်တစ်ရက်တစ်သောင်းကျော်ရှာပေးနေရတယ်။ဒီလိုအရောင်းပါးပုံနဲ့ရေရှည်မလွယ်ဘူး။အခုကအလုပ်သမားခေါ်လည်းလစာကအရင်လိုပေးလို့မရဘူး။ဒါပေမယ့်အရောင်းအဝယ်ကကျမရှိဘူး။ရေရှည်တော့မလွယ်ဘူး"လို့လက်လီအရောင်းဆိုင်ပိုင်ရှင်တစ်ဦးကပြောပါတယ်။
လက်ရှိမှာဆိုင်ခန်းငှားရမ်းခတွေမြင့်တက်တာ၊ကုန်ပစ္စည်းအရင်းတွေတက်တာ၊ အခွန်အခတွေကိုအရင်ကထက်ပိုကောက်ခံလာတာနဲ့အလုပ်သမားငှားခတွေမြင့်တက်လာ ပေမယ့်အရောင်းအဝယ်ကျဆင်းလာတာကြောင့်တစ်နိုင်တစ်ပိုင်အရောင်းဆိုင်တွေအခက်တွေ့နေရတာပဲဖြစ်ပါတယ်။
