ထိုင်းနိုင်ငံ၊ စမုစခွန်ပြည်နယ်၊ အုန်းနွိုင်းမြို့ရှိ မော်တော်ယာဉ်အပိုပစ္စည်းထုတ်လုပ်သည့်စက်ရုံ မီးလောင်မှု တွင် မြန်မာအလုပ်သမား ၇ ဦး ထိခိုက်ဒဏ်ရာ ရခဲ့တဲ့အတွက် ဆေးကုသမှုခံယူနေရတယ်လို့ စစ်ကော်မရှင် လက်အောက်ခံ မြန်မာအလုပ်သမားသံအရာရှိရုံးက ထုတ်ပြန်ထားပါတယ်။

 

ဖေဖေါ်ဝါရီ ၁၀ရက် ညနေ ၄နာရီ ခွဲ ခန့်က Samut Sakhon ပြည်နယ် က ကားအပိုပစ္စည်း တွေ ထုတ်လုပ်တဲ့ စက်ရုံ မှာ မီးလောင်မှု ဖြစ်ပေါ်ခဲ့ပြီး မြန်မာအလုပ်သမား၇ဦး အပါအဝင် ၁၃ဦး ထိခိုက်ဒဏ်ရာ ရရှိခဲ့တယ်လို့ သိရပါတယ်။

 

မီးလောင်ချိန်မှာ စက်ရုံ အတွင်း ထိုင်းနိုင်ငံသားနဲ့ မြန်မာနိုင်ငံသား အလုပ်သမား ၂၀၀ကျော် အလုပ်ဆင်းနေကျတာ ဖြစ်ပြီး မီးလောင် မှု ကြောင့် အလုပ်သမားအချို့ မီးဟပ်ခံရတဲ့ ဒဏ်ရာတွေရရှိသလို တချို့မှာ တကိုယ်လုံး မီးလောင်ဒဏ်ရာ ပြင်းထန်စွာ ရရှိခဲ့တာကြောင့် Vichavej International Hospital နှင့် Mahachai 2 Hospital တို့တွင် ဆေးကုသမှုခံယူ နေရတယ်လို့ ထိုင်းသတင်းတွေအရသိရပါတယ်။

 

ထိခိုက်ဒဏ်ရာ ရခဲ့တဲ့ မြန်မာအလုပ်သမား၇ဦး အတွက် ကုမ္ပဏီ ဘက်မှ လူမှုဖူလုံရေးအာမခံမှတစ်ဆင့် နစ်နာကြေးများ၊ ဆေးကုသစရိတ်များ နဲ့ဆေးရုံတက်နေစဉ်အတွင်း လစာအပြည့်အဝပေးအပ်မယ်လို့ ဆိုပါတယ်။

 

မြန်မာ အလုပ်သမားသံအရာရှိရုံးအနေ နဲ့ လည်း အလုပ်သမားများ ရသင့်ရထိုက်တဲ့ နစ်နာကြေးများ အပြည့်အဝရရှိစေရန် ဆက်လက်ကူညီဆောင်ရွက်ပေးသွားမယ်လို့ သတင်းထုတ်ပြန်ထားပါတယ်။