စစ်တောင်းမြစ်၊ ပဲခူးမြစ်၊ သံလွင်မြစ်နဲ့ ဘီးလင်းမြစ်တို့ဟာ လာမယ့် ၆နာရီကနေ ၃၆နာရီ အတွင်း သက်ဆိုင်ရာ မြို့နယ်တွေရဲ့ စိုးရိမ်ရေမှတ်ကို ရောက်ရှိလာမယ်လို့မိုးလေဝသနှင့်ဇလဗေဒညွှန်ကြားမှုဦးစီးဌာန မှစက်တင်ဘာ၂၄ရက် မနက်၇နာရီမှာ ထုတ်ပြန်ပါတယ်။
ယနေ့မနက်၆နာရီ တိုင်းထွာချက်အရ စစ်တောင်းမြစ်ရေဟာ တောင်ငူမြို့ရဲ့ စိုးရိမ်ရေမှတ်အောက် ၂လက်မခန့်ရှိပြီး လာမယ့် ၆နာရီအတွင်းမှာ စိုးရိမ်ရေမှတ်ကို ရောက်ရှိနိုင်တယ်လို့ အသိပေးထားပါတယ်။
ပဲခူးမြစ်ရေဟာ ပဲခူးမြို့ရဲ့ စိုးရိမ်ရေမှတ်အောက် ၄ပေခွဲခန့်မှာရှိပြီး လာမယ့် ၂၄နာရီအတွင်းစိုးရိမ်ရေမှတ်ကိုရောက်နိုင်သလို သံလွင်မြစ်ရေဟာလည်း ဘားအံမြို့ရဲ့ စိုးရိမ်ရေမှတ်အောက် ၁ပေခန့်မှာရောက်ရှိနေပြီး ၂၄နာရီအတွင်းစိုးရိမ်ရေမှတ်ကိုရောက်ရှိနိုင်မယ်လို့ ဆိုပါတယ်။
ဒါ့အပြင် ဘီးလင်းမြစ်ရေဟာ ဘီးလင်းမြို့ရဲ့စိုးရိမ်ရေမှတ်အောက် ၃ပေခန့်မှာရှိနေပြီ လာမယ့်၃၆နာရီ အတွင်း စိုးရိမ်ရေမှတ်ကိုရောက်လာမှာဖြစ်လို့ တောင်ငူမြို့နယ်၊ ပဲခူးမြို့နယ်၊ ဘားအံမြို့နယ်နဲ့ဘီးလင်းမြို့နယ် အတွင်းရှိ မြစ်ကမ်းအနီး၊ မြေနိမ့်ပိုင်းနေထိုင်သူတွေ အနေဖြင့် ကြိုတင်သတိပြုဖို့ မြစ်ရေမြင့်တက်လာပါက အချိန်မီရှောင်ရှားဖို့ မိုးလေဝသနှင့်ဇလဗေဒညွှန်ကြားမှုဦးစီးဌာန က သတိပေးနှိုးဆော်ထားပါတယ်။
လက်ရှိမှာ တောင်တရုတ်ပင်လယ်ပြင်မှာ ဖြစ်ပေါ်နေတဲ့ တိုင်ဖွန်းမုန်တိုင်း ရာဂါဆာ(RAGASA)အရှိန်ကြောင့် တိုင်းဒေသကြီးနှင့်ပြည်နယ်တွေမှာ မိုးရွာသွန်းမှုများလျက်ရှိပါတယ်။
အခုလိုမိုးရွာသွန်းမှု များတဲ့ အတွက် အချို့နေရာဒေသတွေမှာ ရေကြီးရေလျံတာတွေ ဖြစ်ပေါကာ ဒေသခံ ပြည်သူတွေ ရေဘေးလွတ်ရာသို့ရွှေ့ပြောင်းနေထိုင်လျက်ရှိပါတယ်။
