ထိုင်းနိုင်ငံ ဖက်ချဘွန်းခရိုင်၊ ခေါင်ခိုမြို့နယ်ရှိ တောအုပ်တစ်ခုထဲတွင် ပွဲစားမှ စွန့်ပစ်ခဲ့တဲ့ မြန်မာလုပ်သား၁၅ဦး နဲ့တရုတ်နိုင်ငံသား ၅ဦး ကို ထိုင်းရဲတပ်ဖွဲ့ စစ်ဆေးတွေ့ရှိ ကာ ဖမ်းဆီးခဲ့တယ်လို့ ထိုင်းသတင်းတွေရဲ့ ဖေါ်ပြချက်အရသိရပါတယ်။

 

အောက်တိုဘာ ၃၀ ရက် နံနက်ပိုင်းမှာ တောအုပ်အတွင်း နိုင်ငံခြားသားများ ပုန်းအောင်းနေကြောင်း ခေါင်ခိုရဲစခန်းကို ဒေသခံတွေက သတင်းပေးပို့ခဲ့တဲ့ အတွက် သွားရောက် စစ်ဆေးရာမှာ ၎င်းနေရာမှာ ထိုင်လျက်၊ အိပ်လျက် ပုန်းအောင်းနေတဲ့ နိုင်ငံခြားသားတွေကို တွေ့ရှိခဲ့တယ်လို့ သိရပါတယ်။

 

စစ်ဆေးမေးမြန်းချက်အရ ၎င်းတို့ကို ပွဲစား ဆိုသူက စက်ရုံ တစ်ခုတွင် အလုပ်ရမယ်ဆိုကာ ကားတစ်စီးဖြင့်ခေါ်ဆောင်လာတာလို့ သိရပါတယ်။

 

ထိုင်းနိုင်ငံအတွင်းသို့ သဘာဝလမ်းကြောင်းအတိုင်း ခိုးဝင်လာကြသူတွေဖြစ်ပြီး အောက်တိုဘာ၂၉ရက်မှာ ခေါင်ခိုသို့ရောက်ရှိချိန် ကားမောင်းသူမှ နောက်ထပ် လာကြိုမယ့် ကားသမား လာမယ်ဆိုကာ ၎င်း ကားပေါ်မှဆင်းခိုင်းပြီး တောအုပ်ထဲမှာ ပုန်းအောင်းခိုင်းခဲ့တယ်လို့ သတင်းမှာဖေါ်ပြထားပါတယ်။

 

သို့ပေမယ့် အောက်တိုဘာ၃၀ရက် အထိ လာရောက်ကြိုတာမျိုး မရှိဘဲ စွန့်ပစ်ထားတာကြောင့် ဒေသခံတွေက တွေ့ရှိပြီး ရဲကို အကြောင်းကြားခဲ့တာ ဖြစ်တယ်လို့ သိရပါတယ်။

 

ဖမ်းဆီးရမိသူတွေကို တရားမဝင်ရွှေ့ပြောင်းနေထိုင်မှုဆိုင်ရာ ဥပဒေဖြင့် လုမ်းဆက်ခရိုင် တရားရုံးမှာ တရားစွဲဆိုသွားမှာဖြစ်ပြီး နောက်ပိုင်းမှာ လူဝင်မှုကြီးကြပ်ရေးရဲတပ်ဖွဲ့နဲ့ ပေါင်းစပ်ညှိနှိုင်းကာ နေရပ်နိုင်ငံသို့ ပြန်လည် ပို့ဆောင်သွားမယ်လို့ သိရပါတယ်။

Ref-khaosod News