ရန်ကုန်တိုင်းဒေသကြီးရှိ စက်မှုဇုန်များမှ စက်ရုံအလုပ်ရုံတွေ ကို လျှပ်စစ် မီတာခ တစ်ယူနစ် ၉၀၀ ကျပ်သို့ တိုးမြှင့်ကောက်ယူမယ်လို့ သိရပါတယ်။
ဇန်နဝါရီ၃၀ရက်က ပြုလုပ်တဲ့ LNG ဖြင့် လျှပ်စစ်ဓာတ်အားထုတ်လုပ်/ဖြန့်ဖြူးမည့်အစီအစဉ်များနှင့်ပတ်သက်သော လုပ်ငန်းညှိနှိုင်းအစည်းအဝေးမှာ စစ်ကော်မရှင် လက်အောက်ခံ ရန်ကုန်တိုင်းအစိုးရအဖွဲ့မှ လုပ်ငန်းရှင်တွေကို ပြောကြားခဲ့တယ်လို့ သိရပါတယ်။
၄င်းအစည်းဝေးပွဲမှာ လျှပ်စစ်စွမ်းအားဝန်ကြီးဌာန၊ ပြည်ထောင်စုဝန်ကြီးဦးဥာဏ်ထွန်းမှ စက်မှုဇုံတွေကို ၂၄ နာရီ မီးပေးသွားမယ့်အစီစဉ်နဲ့ စက်မှုဇုံများ၊ အထူးစီးပွါးရေးဇုံနှင့် စက်မှုဇုံပြင်ပသီးခြားတိုက်ရိုက်လိုင်းဆွဲအသုံးပြုနိုင်တဲ့ စီးပွါးရေးလုပ်ငန်းတွေအတွက် နှုန်းထားသစ် တစ်ယူနစ် ကျပ် (၉၀၀) နှုန်းနဲ့ ဖေဖော်ဝါရီလ (၁) ရက်နေ့မှ စတင်ကောက်ခံသွားမယ်လို့ ပြောကြားခဲ့ကြောင်း သိရပါတယ်။
"မီတာခ တစ်ယူနစ် ၉၀၀ တိုးမယ်လို့ သတင်းတွေကြားတယ် စက်ရုံကို စာပို့အကြောင်းကြားတာတော့မရှိသေးဘူး သူတို့ပြောသလို ၂၄နာရီ မီးပေးနိုင်မယ်ဆိုရင် လက်ရှိ မီးစက်မောင်းရတာ ဒီဇယ်ဖိုးထက်စာရင် အဆင်ပြေသေးတယ် မီးမမှန်ရင်တော့ ကုန်ကျစရိတ်ပိုသွားမှာ""လို့လှိုင်သာယာစက်မှုဇုန် (၃)မှ စက်ရုံပိုင်ရှင်တစ်ဦးကပြောပါတယ်။
အခုလို စက်ရုံ၊အလုပ်ရုံတွေနဲ့ စီးပွားရေး လုပ်ငန်း တွေ အတွက် လျှပ်စစ် မီးတာခ တိုးကောက်တာကြောင့် ကုန်ပစ္စည်း ဈေးနူန်း တွေ ပိုတိုးမြှင့်လာမှာကို ပြည်သူတွေက စိုးရိမ်နေကျပါတယ်။
"လုပ်ငန်းရှင်ကတော့ သူအရှုံးခံမှာ မဟုတ်ဘူး တော်ကြာ မီတာခ တိုးလို့ ကုန်ပစ္စည်းဈေးတွေ တတ်တယ်ဆိုပြီး ဖြစ်လာမှာစိုးရိမ်တာ အခု တောင်ကုန်ဈေးနှုန်းကြီးမြှင့်ပြီး ဝင်ငွေနည်းပါးခံမှုဒဏ် ခံနေရတာ ပိုဆိုးလာမှာကိုတော့ စိုးရိမ်တယ်""လို့ ပြည်သူတစ်ဦးကပြောပါတယ်။
လက်ရှိ တွင်ရန်ကုန်ရှိ စက်မှုဇုန်တွေကို လျှပ်စစ်မီးပေးရာမှာ တစ်ရက် ကို ၈နာရီ လောက်သာ အများဆုံး ပေးနိုင်ပြီး လုပ်ငန်း အများစုမှာ ဒီဇယ် မီးစက်တွေကို အသုံးပြူနေရတယ်လို့ သိရပါတယ်။
