ဂျပန်နိုင်ငံရှိ စက်ရုံ အလုပ်ရုံတွေမှာ အလုပ်လုပ်ကိုင်ဖို့ ဂျပန် ကုမ္ပဏီ ၁၀၀ကျော်မှ မြန်မာလုပ်သား ဦးရေ ၁၀၀၀ ခန့် ကို ခေါ်ယူဖို့ ကမ်းလှမ်းထားတယ်လို့ တိုကျိုမြို့ရှိ မြန်မာသံရုံး ထုတ်ပြန်ချက်အရ သိရပါတယ်။
မြန်မာသံရုံးတိုကျို မြို့ အနေနဲ့ အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနက တစ်ဆင့် ပေးပို့လာတဲ့( Demand Letter) အလုပ်ကမ်းလှမ်းစာကို စိစစ်ဆောင်ရွက် ပေးလျက်ရှိရာ လက်ရှိမှာ စာရွက်စာတမ်း အချက်အလက်တွေ ကို စိစစ် ဖို့ အတွက်ကုမ္ပဏီ ၁၁၈ ခုရဲ့စာရင်းနဲ့ ခေါ်ယူမယ့်လုပ်သားဦးရေ စာရင်းတွေ ကို ထုတ်ပြန်ထားပါတယ်။
ထုတ်ပြန်ကြေညာထားတဲ့ စာရင်းထဲပါဝင်တဲ့ ကုမ္ပဏီတွေ အနက် အချို့ ကုမ္ပဏီတွေ ဟာ ကြေညာချက်မထုတ်ပြန်ခင်ကတည်းက သံရုံးသို့ စာရွက်စာတမ်း အချက်အလက်တွေ ကြိုတင်ပေးပို့ထားတာတွေရှိတဲ့အတွက် အခုလို ကြိုတင်ပေးပို့မှုဟာ အကျုံးမဝင်တာကြောင့် ယခုကြေညာချက် မှာ ပါရှိမှသာ စာရွက်စာတမ်းအထောက်အထားတွေကို စာတိုက်ကတစ်ဆင့် ပြန်လည်ပေးပို့ဖို့ မြန်မာသံရုံးက အသိပေးထားပါတယ်။
တိုကျိုရှိ မြန်မာသံရုံးအနေနဲ့ ဂျပန်နိုင်ငံမှ အလုပ်သမားကြီးကြပ်ရေးကုမ္ပဏီနဲ့ ခေါ်ယူမယ့် စက်ရုံ/ကုမ္ပဏီများ တရားဝင်တည်ထောင်ထားခြင်းရှိ/မရှိကို စာရွက်စာတမ်းများဖြင့် စိစစ်ကာ သဘောထားမှတ်ချက်များကို အလုပ်သမားဝန်ကြီးဌာနသို့ ပြန်လည်ပေးပို့ ဆောင်ရွက်လျက်ရှိတယ်လို့သိရပါတယ်။
လက်ရှိတွင် ဂျပန်နိုင်ငံ သို့ ဘိုးဘွားစောင့်ရှောက်ရေး၊ စားသောက်ကုန်၊ ဝန်ဆောင်မှုနဲ့ ကုန်ထုတ်လုပ်မှုလုပ်ငန်းတွေ အပါအဝင် အခြားလုပ်ငန်းများအတွက် မြန်မာလုပ်သားတွေ ကို လစဉ် ခေါ်ယူလျက်ရှိကြောင်း သိရပါတယ်။
