ရန်ကုန်တိုင်းဒေသကြီး အတွင်းရှိ စက်မှုဇုန်နဲ့ စက်မှုဇုန်ပြင်ပရှိ စက်ရုံ/အလုပ်ရုံတွေမှာ ခွင့်ပြုမိန့်ထက်ကျော်လွန်ပြီး အလုပ်သမားတွေ ကို အချ်ိန်ပိုခေါ်ယူ အလုပ်ခိုင်းစေခြင်း ကို စစ်ဆေး အရေးယူသွားမယ်လို့ အာဏာသိမ်း စစ်ကောင်စီရဲ့ အလုပ်သမားဝန်ကြီးဌာန၊ အလုပ်ရုံနှင့်အလုပ်သမားဥပဒေစစ်ဆေးရေးဦးစီးဌာန ကထုတ်ပြန်ပါတယ်။
စက်မှုဇုန်နဲ့စက်မှုဇုန်ပြင်ပရှိ စက်ရုံအလုပ်ရုံ တွေ အနေနဲ့ စက်ရုံရှိ အလုပ်သမားတွေကို အချိန်ပိုခေါ်ယူ လုပ်ကိုင်ရန် အတွက် အလုပ်သမားဝန်ကြီးဌာနထံ အချိန်ပိုခွင့်ပြုမိန့်တောင်းခံ ရတယ်လို့ သိရပါတယ်။
အချို့စက်ရုံ အလုပ်ရုံတွေဟာ တနင်္လာနေ့မှ သောကြာနေ့အထိ အချိန်ပိုကို ခွင့်ပြုမိန့်ထက်ကျော်လွန် လုပ်ကိုင်နေကြောင်း အလုပ်သမားများရဲ့ တိုင်ကြားမှုအရ စစ်ဆေး ခဲ့ရာ ခွင့်ပြုမိန့်ထက် ကျော်လွန်လုပ်ကိုင်နေကြောင်း စစ်ဆေးတွေ့ရှိရတယ်လို့ သိရပါတယ်။
ဒါ့အပြင် စနေနေ့တွင် လည်း ခွင့်ပြုမိန့်ထက်ကျော်လွန်၍ အချိန်ပိုကို ညနေ ၆နာရီခွဲ ၊ ၇နာရီ အထိ အောလင်း/အောနိုက်ခိုင်းစေနေတာတွေ ကိုပါ စစ်ဆေးတွေ့ရှိရတယ်လို့ အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာနမှသိရပါတယ်။
အခုလို ခွင့်ပြုမိန့်ထက် အချိန်ပိုခေါ်ယူတဲ့ စက်ရုံ အလုပ်ရုံ တွေ ကို ဥပဒေနှင့်အညီ အရေးယူဆောင်ရွက်သွားမှာ ဖြစ်သလို ထပ်မံပြီး ခွင့်ပြုမိန့်ထက်ကျော်လွန် လုပ်ကိုင်နေတဲ့ စက်ရုံ၊ အလုပ်ရုံ တွေကိုလည်း စစ်ဆေးအရေးယူသွား မယ်လို့ သိရပါတယ်။
"အလုပ်သမားတွေ ကို အောလင်း အောနိုက် ခိုင်းတာတွေ က စက်ရုံ အတော်များများ မှာ ဖြစ်နေတာ ဝန်ကြီးဌာနဘက်က သေချာစစ်ဆေးပြီး ပြောတဲ့ အတိုင်းအရေးယူမယ်ဆိုရင်တော့ ကောင်းတာပေါ့ စစ်ဆေးတုန်းခဏဘပဲ ဥပဒေ ကို လိုက်နာပြီး ကြာရင် စက်ရုံ တွေဘက်က ချိုးဖောက်တာတွေ လုပ်မှာ စိုးတယ် ဒါကြောင့် အလုပ်သမားတွေ တိုင်လို့ စစ်ဆေးတာထက် မကြာခဏ စစ်ဆေးတာမျိုး လုပ်စေချင်တယ်""လို့ ရွှေပြည်သာစက်မှုဇုန်မှာ လုပ်ကိုင်နေတဲ့ အထည်ချုပ် လုပ်သားတစ်ဦးကပြောပါတယ်။
Myanmar Labour News ထံ အလုပ်သမားတွေပေးပို့တဲ့ ပေးစာအရ အထည်ချုပ် စက်ရုံ တွေမှာ အချိန်ပိုကို အလွန်အကျွံခေါ်ယူခိုင်းစေပြီး အနားမပေးတာကြောင့် ရုပ်ပိုင်းဆိုင်ရာ စိတ်ပိုင်းဆိုင်ရာထိခိုက်မှုတွေဖြစ်ပေါ်နေပြီး လူသေဆုံးမှုမထိပါ ဖြစ်ပေါ်နေတယ်လို့ သိရပါတယ်။
အချိန်ပိုခေါ်ယူတာနဲ့ ပတ်သက်ပြီး ခွင့်ပြုမိန့်ထက်ကျော်လွန်လုပ်ကိုင်ခြင်းမပြု ဖို့ အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာနက ရန်ကုန်တိုင်းဒေသကြီးရှိ စက်ရုံ အလုပ်ရုံ တွေ ထံ အကြောင်းကြားစာတွေ ပေးပို့ ထားတယ်လို့ သိရပါတယ်။
