Adidas တံဆိပ် ဖိနပ်တွေ ချုပ်လုပ်နေတဲ့ ချန်းရိ Tsang Yih စက်ရုံလုပ်သားတွေ တောင်းဆိုထားတဲ့လုပ်ခဒေးကြေးကို စက်ရုံဘက်က ကျပ် ၉၀၀ သာ တိုးမြှင့်ပေးတယ်ဆိုတဲ့ စာချုပ်တစုံ လူမှုကွန်ရက်တွေမှာ မျှဝေနေတာကို တွေ့ရပါတယ်။
အလုပ်သမားတွေတောင်းဆိုတဲ့ ဒေးကြေး၊ အချိန်ပိုကြေး၊ လုပ်သက်ကြေး နဲ့ ရက်မှန်ကြေး တိုးမြှင့်ပေးဖို့ ညှိနှိုင်းမှုမှာ သဘောတူညီမှုရခဲ့ပြီး လှိုင်သာယာမြို့နယ်(အနောက်ပိုင်း) အလုပ်သမားဦးစီးဌာန တာဝန်ရှိသူတွေရဲ့ ရှေ့မှာ လက်မှတ်ရေးထိုးတယ်လို့လည်း နှစ်ဖက်သဘောတူစာချုပ်မှာ ဖော်ပြထားပါတယ်။
အဲဒီစာချုပ်ထဲမှာ အလုပ်သမားကိုယ်စားလှယ် ၉ ဦးနဲ့ သဘောတူခဲ့လို့ ဖော်ပြထားပြီး အလုပ်သမား တွေဆို တောင်းဆိုခဲ့တဲ့ ဒေးကြးစုစုပေါင်း ကျပ် ၁၂၀၀၀ ကို စက်ရုံဘက်က ကျပ် ၉၀၀ တိုးပြီး ဒေးကြေးကို ကျပ် ၈၅၀၀ ပဲ သတ်မှတ်ပေးခဲ့တာပါ။
ရက်မှန်ကြေးကို တိုးပေးခဲ့ပြီး စုစုပေါင်း ကျပ် ၄၀၀၀၀ ပေးခဲ့ပေမဲ့ အချိန်ပိုကြေးကို မူလအတိုင်းပဲ ပေးချေသွားမယ်လို့ စာချုပ်မှာတွေ့ရပါတယ်။
လုပ်သက် ဆုကြေးကို ရက်အပိုင်းအခြားခွဲခြားပြီး လုပ်သက်ရက်အလိုက် အနည်းဆုံး ၅၀၀၀ ကနေ အများဆုံး ကျပ် ၆၀၀၀၀ အထိ သတ်မှတ်ထားပါတယ်။
နှစ်ဖက်ညှိနှိုင်း သဘောတူထားတဲ့ ဒေးကြေး၊ အချိန်ပိုကြေး၊ ရက်မှန်ကြေးနဲ့ လုပ်သက်ကြေးတွေကို တနှစ်အတွင်း တိုးမြှင့်တောင်းဆိုတာ မပြုရလို့ စာချုပ်မှာ ပါရှိတဲ့အပြင် လာမဲ့ ဇွန်လမှာ ညှိနှိုင်းထားတဲ့ လုပ်ခလစာတွေ ခံစားခွင့်ရမှာလို့ ဖော်ပြထားတယ်။
စက်ရုံအတွင်း တောင်းဆိုမှုတွေကို မေလ ၁၄ ရက်မှာ စတင်ခဲ့ပြီးနောက် တောင်းဆိုတဲ့ အလုပ်သမားတွေ မရှိဖို့ အလုပ်ပိတ်ပြီး ဒီသဘောတူညီမှု ရခဲ့တာဖြစ်ပါတယ်။
ဒီညှိနှိုင်းထားတဲ့ ရလာဒ် စာချုပ်ကို သီးခြားအတည်ပြုနိုင်တာ မရှိသလို Myanmar Labour News ကလည်း အလုပ်သမားတွေရဲ့ သဘောထားမေးမြန်းဖို့ ကြိုးစားဆက်သွယ်နေပါတယ်။
စက်ရုံမှာ အလုပ်သမား ၆၂၀၀ ကျော်ရှိပြီး တောင်းဆိုမှုအတွင်းအလုပ်သမား အားလုံးနီးပါး ပါဝင်ခဲ့တာ ဖြစ်ပါတယ်။
လက်ရှိ သာဓုကန်စက်မှုဇုန်က Adidas ဖိနပ်ချုပ်တဲ့ Myanmar Pon Chen စက်ရုံအလုပ်သမားတွေကလည်း ဒေးကြေးကျပ် ၁၃၀၀၀ တိုးမြှင့်ပေးဖို့ တောင်းဆိုထားပါတယ်။
