ချင်းတွင်းမြစ်ရေဟာ စစ်ကိုင်းတိုင်း ဖောင်းပြင်မြို့မှာ စိုးရိမ်ရေအမှတ်သို့ ကျော်လွန်ရောက်ရှိနေသလို မော်လိုက်၊ ကလေးဝ၊ မင်းကင်း၊ မုံရွာမြို့တို့ မှာ လာမယ့် ၂၄နာရီ အတွင်း စိုးရိမ်ရေအမှတ် ကို ရောက်ရှိနိုင်မယ် လို့ မိုးလေဝသနှင့် ဇလဗေဒညွှန်ကြားမှုဦးစီးဌာနက သတိပေး ထုတ်ပြန် ပါတယ်။

 

မွန်းတည့် ၁၂နာရီ ခွဲ အချိန် တိုင်းတာချက်အရ ချင်းတွင်းမြစ်ရေဟာ ဖောင်းပြင်မြို့ရဲ့ စိုးရိမ်ရေမှတ်ကိုကျော်လွန်နေပြီး လာမယ့် ၁ရက် အတွင်း ပေဝက်ခန့် ဆက်လက်မြင့်တတ်မယ်လို့ ထုတ်ပြန်ထားပါတယ်။

 

ဒါ့အပြင် မော်လိုက်မြို့နယ်၊ မင်းကင်းမြို့နယ်၊ မုံရွာ မြို့နယ် တို့ မှာ တော့ ချင်းတွင်းမြစ်ရေဟာ လာမယ့် ၂၄နာရီ အတွင်း စိုးရိမ်ရေမှတ်ကို ရောက်ရှိလာမှာ ဖြစ်သလို ကလေးဝ မြို့နယ်မှာတော့ လာမယ့်၃၆နာရီ အတွင်း စိုးရိမ်ရေမှတ် သို့ ရောက်ရှိလာမယ်လို့ ဆိုပါတယ်။

 

ဒါကြောင့် ဖောင်းပြင်၊ မော်လိုက်၊ ကလေးဝ၊ မင်းကင်း၊ မုံရွာမြို့နယ်တို့ရှိ မြစ်ကမ်းအနီးနဲ့ မြေအနိမ့်ပိုင်း နေထိုင်သူတွေ ဟာ ကြိုတင်သတိပြုကြဖို့ နဲ့ မြစ်ရေတက်လာပါက အချိန်မီရှောင်ရှားနိုင် ဖို့ သတိပေးထားပါတယ်။

 

၂၀၂၅ ခုနှစ်၊ ဇွန်လ ၂၈ ရက်နေ့၊ မြန်မာစံတော်ချိန် ၁၆:၃၀ နာရီအချိန် တိုင်းထွာချက်များအရ ယနေ့ညနေမှ ၄-၇-၂၀၂၅ ရက်နေ့အတွင်း တိုင်းနှင့် ပြည်နယ် အသီးသီးမှာ နေရာအနှံ့အပြား မိုးထစ်ချုန်းရွာပြီး၊ အချို့ဒေသများတွင် ဒေသအလိုက်နှင့် နေရာကွက်၍ မိုးကြီးနိုင်တာကြောင့် မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွေခြင်း၊ လျှပ်တစ်ပြက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်တယ်လို့ ဆိုပါတယ်။

 

အဆိုပါဒေသများရှိ ကုန်းမြင့်ဒေသအနီးတွင် နေထိုင် ကြသူများအနေဖြင့် မြေပြိုမှုအန္တရာယ်၊ မြစ်ငယ်၊ ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများကို ကြိုတင်သတိပြုရှောင်ရှားနိုင်ပါရန်နှင့် ပြည်တွင်းရေကြောင်းသွားလာရေး၊ လေကြောင်းပျံသန်းရေးနှင့် ဆည်မြောင်းတာတမံများအနေဖြင့် လိုအပ်သည်များ ကြိုတင်ပြင်ဆင်ဆောင်ရွက် ထားနိုင်ပါရန် မိုးဇလက သတိပေးနှိုးဆော်ထားပါတယ်။