ကုန်ဈေးနှုန်းမြင့်တက်လာတာကြောင့် စားဝတ်နေရေး မပြေလည်မှုတွေကြုံတွေ့နေရတာကြောင့် လုပ်ခလစာတိုးမြှင့်ပေးဖို့ Myanmar Sunny ဖိနပ်စက်ရုံအလုပ်သမား ၁၂၀၀ ကျော် လုပ်ငန်းခွင်အတွင်း ထိုင်ပြီး တောင်းဆိုမှုပြုလုပ်နေတယ်လို့ သိရပါတယ်။
ရန်ကုန်တိုင်း လှိုင်သာယာမြို့နယ် စက်မှုဇုန် ၂ ဦးထွန်းညိုလမ်းမှာဖွင့်လှစ်ထားတဲ့ ဂျပန်နိုင်ငံသားပိုင် ဖိနပ်စက်ရုံမှာ ဒီကနေ့ ဇွန် ၂၀ ရက်မနက်ပိုင်းမှာ အလုပ်သမား တွေ လုပ်ငန်းခွင်မဝင်ဘဲ တောင်းဆိုနေကြတာဖြစ်ပါတယ်။
"ဟုတ်ကဲ့ဒီမနက် မှာ ငုတ်တုတ်ထိုင်ပြီး လုပ်ငန်းခွင်မဝင်ဘဲပြနေတာပါ အဓိကတောင်းဆိုချင်တာက ကုန်ဈေးနှုန်းက မြင့်တက် အဆောင်လခက ရေဖိုးမီးဖိုးကဈေးတွေမြင့်တက်လာတော့ လုပ်ခလစာမလောက်လို့ တိုးတောင်းချင်တာပါ။ တခြားအချက်တွေက ဖိနှိပ်ပြောတာတွေ မတရားအော်ဟစ်တာတွေရှိတယ် စက်ရုံက ပိတ်မယ်ပြောပြီး မပိတ်သေးတော့ စောင့်ရင်းနဲ့ လူ ၄၀၀ လောက်က ထွက်သွားတယ် ကျန်တဲ့လူတွေကရှိတာနဲ့လုပ်ရတော့ အခက်အခဲတွေရှိတယ် ပြီးတော့ အဲ့ဒါကြောင့် အခြေခံဝန်ထမ်းတွေအကုန်လုံးကတညီတညွတ်တည်း စုပေါင်းပြီးတောင်းကြတယ် အဲ့လိုမျိုးပါ အခုလောလောဆယ်တော့ စက်ရုံက မစ္စတာလီနဲ့ညှိဖို့ခေါ်ထားတာရှိပါတယ်" လို့ တောင်းဆိုမှုပြုလုပ်ရာမှာပါဝင်တဲ့ အလုပ်သမားကပြောပါတယ်။
လက်ရှိပေးချေနေတဲ့ နှုန်းထားအရ ဒေးကြေး ၅၂၀၀ ကျပ် ဖြစ်ပြီး တစ်နာရီလုပ်ခလစာ ၆၅၀ ကျပ်ဖြစ်တာကြောင့် ပျမ်းမျှအားဖြင့် တစ်လလျင် ကျပ် ၂၁၀၀၀၀ ဝန်းကျင်သာရရှိနေပြီး စားဝတ်နေရေးအတွက် ဖူလုံမှုမရှိဘဲ အခက်အခဲဖြစ်နေတယ်လို့ ဆိုပါတယ်။
အလုပ်သမားတွေ တောင်းဆိုထားတဲ့အချက်အလက်တွေအရ တစ်နာရီလျင် လုပ်ခလစာ ၇၅၀ ကျပ်နှုန်းတိုးပေးဖို့ အလုပ်ထွက်သွားသော အလုပ်သမားတွေနေရာမှာ အစားထိုးပေးဖို့ နှစ်အလိုက် လုပ်သက်ကြေးခွဲခြားပေးဖို့ နဲ့ စက်ရုံ ပိတ်မယ်ဆိုပါက ပိတ်မည့်ရက်အား တိကျစွာပြောဖို့ စတဲ့အချက်တွေပါဝင်တယ်လို့ သိရပါတယ်။
Myanmar Sunny ဖိနပ်စက်ရုံမှာ Hawkins Premium အမှတ်တံဆိပ်ချုပ်လုပ်တာဖြစ်ပြီး နိုင်ငံတကာကိုတင်ပို့နေတာဖြစ်တယ်လို့ သိရပါတယ်။
