တောင်ကိုရီးယား နိုင်ငံ ရှိ သစ်အချောထည် ထုတ်လုပ်တဲ့ စက်ရုံ မှာ လုပ်ကိုင်နေတဲ့ မြန်မာလုပ်သား တစ်ဦးဟာ မိမိကိုယ်ကို ကြိုးဆွဲချ ကာ အဆုံးစီရင်မှု ဖြစ်ပွားခဲ့တယ် လို့ ကိုရီယားရောက် မြန်မာလုပ်သားအရေး ကူညီနေသူတွေထံကနေသိရပါတယ်။
ဒီဇင်ဘာ ၁၈ရက် မနက်အစောပိုင်းမှာ သစ်စက်ရုံရဲ့ ဂိုဒေါင် အတွင်း ဖြစ်ပွားခဲ့ခြင်း ဖြစ်ပြီး မြန်မာလုပ်သားရဲ့ ရုပ်အလောင်းကို စက်ရုံတစ်ခုတည်း အလုပ်လုပ်တဲ့ ကိုရီးယားလုပ်သားက နံနက် ၇ နာရီအချိန်ခန့်မှာ တွေ့ရှိပြီး ရဲစခန်းကို အကြောင်းကြားခဲ့တယ်လို့ဆိုပါတယ်။
ကွယ်လွန်သူဟာ ရန်ကုန်မြို့၊ ဒဂုံဆိပ်ကမ်းမြို့နယ်ကနေ ကိုရီးယားနိုင်ငံ၊ ဂယောင်ဂီပြည်နယ်၊ ဟွာဆောင်မြို့ရှိ သစ်အချောထည်စက်ရုံမှာ လာရောက် အလုပ် လုပ်ကိုင်နေတဲ့ ကိုဉာဏ်လင်းပြည့် လို့ သိရပါတယ်။
"ကိုယ့်နိုင်ငံသားတစ်ယောက် အခုလို သေဆုံး တာကြားရတာ အလွန်စိတ်မကောင်း ဖြစ်မိတယ် လုပ်ငန်းခွင်ထဲ စိတ်ဖိစီးမှုတွေ များလို့ပဲလား အခြားအကြောင်းရာတွေကြောင့်ပဲလားတော့မသိဘူး ပေါ့ ဒါပေမယ့် ကိုရီးယား သားတွေရဲ့ ပြောဆိုပုံကလည်း မလွယ်ဘူး လုပ်ငန်းခွင်ထဲ လုပ်ကိုင်သူတွေဘဲ ဒီခံစားချက်ကို နားလည်တယ် နိုင်ငံရပ်ခြားမှာ အလုပ်လုပ်ရသူတွေ က ထုတ်မပြောကျတာ သာရှိမယ် စိတ်ပင်ပန်းမှုများကျတယ်""လို့ ကိုရီးယားရောက်မြန်မာလုပ်သားတစ်ဦးကပြောပါတယ်။
လက်ရှိ သေဆုံးသူရဲ့ ရုပ်အလောင်းကို ရဲက စုံစမ်းစစ်ဆေးနေပြီး ရဲခွင့်ပြုချက်ရပါက သင်္ဂြိုဟ်မယ့်ရက်ကို ကြေညာပေးမယ်လို့ မြန်မာလုပ်သားအရေး ကူညီပေးနေသူတွေဘက်က အသိပေးထားပါတယ်။
ဒါအပြင် နာရေး အတွက်လည်း တတ်နိုင်သလောက် အကူညီပေးဖို့ ကိုရီးယားရောက် မြန်မာ များကို မေတ္တာရပ်ခံထားကာ မြန်မာလုပ်သား အချို့ကလည်း ကူငွေ ထည့် ဝင်ပေးတာ တွေ့ရပါတယ်။
၎င်း သစ်စက်ရုံတွင် ယခုနှစ် မေလပိုင်းမှာ လည်း မြန်မာလုပ်သားတစ်ဦးနေမကောင်းဖြစ်ကာ(၉၆ပါး)ရောဂါဖြင့် သေဆုံးခဲ့သေးတယ်လို့ သိရပါတယ်။
