ဒီကနေ့မေလ ၂၂ရက်ညနေပိုင်းက ရွှေပြည်သာမြို့နယ်ရှိ ဟန်ဂျင်း (7) လို့လူသိများတဲ့ Xinda Home စက်ရုံက Super ဟာ အချိန်ပိုဆင်းရန်ငြင်းဆိုတဲ့ အလုပ်သမား ၂ ဦးကို ကိုယ်ထိလက်ရောက်ထိုးကြိတ်မှူ ဖြစ်ပွါးခဲ့တယ်လို့ သိရပါတယ်။
"စခန်းမှာအမှူသွားဖွင့်တော့ တရားရုံးတိုက်ရိုက်လျှောက်ခိုင်းထားတယ်။ မနက်ဖြန်တရားရုံးသွားမယ်။ အလုပ်သမားတစ်ယောက်က လူကွယ်ရာဘက်ကိုဆွဲခေါ်ပြီးမှထိုးတာ။ လှမ်းမြင်နေရလို့ အကုန်ပြေးပြီး ကျန်တစ်ယောက်ကလည်းသူ့အဖော်ထိုးခံရလို့ လိုက်တားတာ သူ့ကိုပါမျက်နှာထိုးတယ်။ပထမတစ်ယောက်ကတော့ကျောကိုထိုးခံရတာ နောက်တစ်ယောက်ကတော့မျက်နှာတွေ။ စက်ရုံကအရင်ဆေးထည့်ပေးပြီးမှ ဆေးရုံရောက်တာ" လို့ အဆိုပါအလုပ်သမားကို ကူညီပေးနေသူကဆိုပါတယ်။
အခုလိုကိုယ်ထိလက်ရောက်ရိုက်နှက်မှုဖြစ်ရခြင်းရဲ့အဓိက အကြောင်းရင်းကတော့ OT တွေ ညလုံးပေါက်ခေါ်နေတာကို ဆင်းဖို့ငြင်းဆန်တဲ့အတွက် ထိုးကြိတ်မှူဖြစ်ပွါးတယ်လို့အလုပ်သမားကပြောပါတယ်။
အလုပ်သမားတစ်ဦးဟာ ဆယ်ချက်ခန့်ထိုး ကြိတ်ခံရလို့ ကျောမှာဒဏ်ရာရပြီး ဝိုင်းဆွဲတဲ့ အလုပ်သမားရဲ့မျက်နှာကို ၃ချက်ထိုးခံခဲ့ရတယ်လို့ အထိုးခံရတဲ့အလုပ်သမားများကပြောပါတယ်။
အဆိုပါစက်ရုံဟာ ပြီးခဲ့တဲ့ရက်ပိုင်းလေးကမှအလုပ်သမားဆန္ဒပြမှူဖြစ်ပွါးခဲ့ပြီး ပြေလည်ကာစပဲ ရှိသေးတယ်လို့သိရပြီး အလုပ်သမားတွေကိုည၁၂နာရီနောက်ပိုင်းအထိနဲ့ ညလုံးပေါက်အချိန်ပိုခေါ်ယူမှုရှိတာကြောင့် အလုပ်သမားကပင်ပန်းလို့မဆင်းနိုင်ကြောင်းငြင်းဆန်ရာမှဖြစ်ပွားတယ်လို့ သိရပါတယ်။
လက်ရှိမှာတော့ ကိုယ်ထိလက်ရောက် ကျူးလွန်တဲ့ Super ဟိန်းမင်းထွန်း ကိုအမှုဖွင့်နိုင်ရေးဆောင်ရွက်နေတယ်လို့ သိရပါတယ်။
#MyanmarLabourNews
Photo-STUM
