လုပ်ငန်းခွင်နဲ့ မသက်ဆိုင်တဲ့ အလုပ်တွေကို ခိုင်းစေခြင်းမပြုလုပ်ဖို့ အပါအဝင် အချိန်ပိုကို ဖိအားပေးဆင်းခိုင်းတာမျိုးတွေ မပြုလုပ်စေချင်ဘူးလို့  Yangon Art Materials Incorporation Limited  က စက်ရုံလုပ်သားတွေက တောင်းဆိုလိုက်ပါတယ်။

ရန်ကုန်တိုင်း လှိုင်သာယာမြို့နယ် မြစိမ်းရောင်စက်မှုဇုန် မြရတနာလမ်းမှာဖွင့်လှစ်ထားတဲ့ အဲ့ဒီစက်ရုံမှာ အလုပ်သမား ၃၀၀ ကျော်နဲ့ လည်ပတ်နေတာဖြစ်ပြီး အလုပ်သမားသမဂ္ဂဖွဲ့စည်းထားမရှိဘူးလို့ သိရပါတယ်။

စက်ရုံမှာ ပန်းချီဘောင်တွေ ထုတ်လုပ်တာဖြစ်ပြီး တရုတ်နိုင်ငံသားပိုင် ဖြစ်တယ်လို့ အလုပ်သမားတွေကပြောဆိုပါတယ်။

လုပ်ငန်းခွင်ထဲမှာ လုပ်ငန်းခွင်နဲ့ မသက်ဆိုင်တဲ့ ပြင်ပအလုပ်တွေ ခိုင်းစေတာ စက်ရုံပြင်ပ ဘွိုင်လာအတွက် ထင်းသယ်ခိုင်းတာ ထင်းခုတ်ခိုင်းတာတွေရှိပြီး ငြင်းဆန်ခွင့်မရှိဘဲ လုပ်ကိုင်နေရတာကြောင့် စိတ်ဖိစီးမှုတွေ ဖြစ်ပေါ်နေတယ်လို့ အလုပ်သမားတွေက ဆိုပါတယ်။

လုပ်ငန်းခွင်ဆိုင်ရာ ချိုးဖောက်ခံရမှုများကို သတင်းဌာန တွင် ဖော်ပြပြီးနောက်မှာ ကာလကြာရှည်လုပ်ကိုင်နေရတဲ့ နေ့စားအလုပ်သမားတွေထဲက တချို့ တဝက်ကို ဇန်နဝါရီ ၁ ရက်နေ့တွင် အတည်ဝန်ထမ်းအဖြစ်ခန့်အပ်ခဲ့ပြီးနောက် ၆ လ ကျော်လုပ်သက်ရှိ နေ့စား အလုပ်သမားတွေ ကျန်ရှိနေသေးတယ်လို့ အဲ့ဒီစက်ရုံက အလုပ်သမားတွေ ထံကသိရပါတယ်။

လူမှုဖူလုံရေးကတ် ရရှိထားပြီး ဖူလုံရေးဘက်မှ ဆေးခွင့်ရရှိသော်လည်း အလုပ်ရှင်ဘက်က ဒေးကြေး ၄၈၀၀ ကျပ်နဲ့ ရက်မှန်ကြေး ၁၀၀၀၀ ကျပ် ဖြတ်တောက်ခံရတာရှိတယ်လို့ ဆိုပါတယ်။

" အလုပ်ပိတ်တဲ့အခါကျရင် ခွဲခြားပြီး ပိတ်တာရှိတယ် တန်းတူအခွင့်အရေးမရဘူးပေါ့ အချိန်ပို အိုတီဆင်းခိုင်းတာမျိုး တွေမှာ အလုပ်သမားတွေရဲ့ သဘောဆန္ဒကို မမေးဘဲ အဓမ္မခိုင်းစေတာ ရှိတယ်  ငြင်းဆန်ရင်  ခွဲခြားဆက်ဆံခံရတယ်"လို့ အမည်မဖော်လိုတဲ့ အလုပ်သမားတစ်ဦးကပြောဆိုပါတယ်။

လက်ရှိ လုပ်ကိုင်နေတဲ့ လုပ်ငန်းအမျိုးအစားဖြစ်တဲ့ ပန်းချီဘောင် စက်ရုံမှာ ၂ ရုံဖွင့်လှစ်ထားတာကြောင့် အလုပ်သမားတွေကို ခန့်အပ်ထားတဲ့ စက်ရုံမှာ အတည်တကျ ခိုင်းစေတာမရှိဘဲ လဲလှယ်ခိုင်းစေတာကြောင့် အခက်တွေ့နေရတယ်လို့ လည်း အလုပ်သမားက ဆိုပါတယ်။

"EC  စာချုပ်ကိုလည်း အလုပ်သမားတွေဘက်ကို ပေးဖတ်တာမျိုးမရှိဘူးခင်ဗျ လက်မှတ်ထိုးခိုင်းပြီး အလုပ်ရှင်ဘက်ကပဲ သိမ်းထားတယ် ပြီးတော့ အလုပ်လုပ်နေချိန်မှာ ထိခိုက်မှု တစ်စုံတစ်ရာရှိရင် အလုပ်ရှင်ဘက်က တာဝန်ယူပေးတာမျိုးမရှိဘူးပေါ့နော် အဲ့ဒါကိုတော့ တာဝန်ယူဆောင်ရွက်ပေးစေချင်ပါတယ်ခင်ဗျ" လို့ စက်ရုံအလုပ်သမားတစ်ဦးက ပြောဆိုပါတယ်။

#MyanmarLabourNews