အလုပ်သမားတွေရဲ့ တစ်နေ့လုပ်ခဖြစ်တဲ့  အနည်းဆုံးအခကြေးငွေကို ပြင်ဆင်သတ်မှတ်ဖို့ စီစဉ်နေတယ်လို့  စကစရဲ့ အလုပ်သမားဝန်ကြီးဌာနကထုတ်ပြန်ပါတယ်။

"ဒါကသူတို့ပြင်ဆင်သတ်မှတ်လိုက်တဲ့အပေါ်ကြည့်ရမှာပဲ။ ဒါကအမျိုးသားအဆင့်လား ဘယ်လိုလူတွေနဲ့  ဘယ်လိုပုံစံမျိုးနဲ့လဲပေါ့  အလုပ်သမားတွေအပေါ် တကယ်စေတနာထားပြီးလုပ်တာလားဆိုတာရော  ဘယ်လောက်နှုန်းထားလဲပေါ့  စောင့်ကြည့်ရအုံးမယ်"လို့ အလုပ်သမားရေးဆောင်ရွက်နေသူတစ်ဦးက ဆိုပါတယ်။

စစ်ကောင်စီအနေနဲ့  တတိယမြောက်အနည်းဆုံးအခကြေးငွေကို သတ်မှတ်ဖို့စီမံနေတယ်ဆိုပြီး နိုဝင်ဘာ ၂၅ရက်က ပြုလုပ်တဲ့ စစ်ကောင်စီရဲ့ခြောက်လပတ်အစည်းအဝေးမှာ အသိပေးခဲ့တာဖြစ်ပြီး ဘယ်နေ့ဘယ်အချိန်မှာ နှုန်းထားဘယ်လောက်အဖြစ်  သတ်မှတ်မယ်ဆိုတဲ့  အသေးစိတ်ရှင်းလင်းတာမျိုးတော့ဖော်ပြထားတာမရှိပါဘူး။

အနည်းဆုံးအခကြေးငွေနှုန်းထားကို ၂နှစ်မှာတစ်ကြိမ်ပြင်ဆင်ရမှာဖြစ်ပြီး   အနည်းဆုံးအခကြေးငွေနှုန်းထားအသစ်ကို  ၂၀၂၀မှာပြင်ဆင်သတ်မှတ်ဖို့ သုံးပွင့်ဆိုင်အမျိုးသားကော်မတီမှာ   ဆွေးနွေးဆုံးဖြတ်ထားပေမဲ့  ကိုဗစ်နဲ့  စစ်အာဏာသိမ်းခြင်းကြောင့် လက်ရှိအချ်ိန်အထိ ၅နှစ်နီးပါးကြာ နှုန်းထားအသစ်ပြင်ဆင်   မသတ်မှတ်နိူင်တာကြောင့် ၂၀၁၇ကအတည်ပြုသတ်မှတ်ထားတဲ့    တစ်ရက်လုပ်ခ ကျပ်  ၄၈၀၀ နှုန်းနဲ့သာအလုပ်သမားတွေက  လုပ်ကိုင်နေကြရတာဖြစ်ပါတယ်။

လက်ရှိမှာ  ပြည်တွင်းအလုပ်သမားတွေဟာ   ၅နှစ်ကြာအထိ အနည်းဆုံးအခကြေးငွေပြင်ဆင်မှုမရှိခဲ့တာကြောင့်  ကုန်ဈေးနှုန်းတွေအဆမတန်မြင့်တက်နေတဲ့  လက်ရှိကာလမှာပင်  တစ်နေ့လုပ်အားခကို ၄၈၀၀ကျပ်နဲ့သာ လုပ်ကိုင်နေရတာကြောင့်   စား၀တ်နေရေးခက်ခဲလာသလို  လက်ရှိကုန်ဈေးနှုန်းနဲ့မကိုက်ညီတာကြောင့်     သင့်တင့်မျှတတဲ့  လုပ်အားခတွေရရှိဖို့   အလုပ်သမားတွေကတစ်ရက်လုပ်ခ ၈၀၀၀ ကျပ်ပေးဖို့တောင်းဆိုမှုတွေရှိနေပါတယ်။

အဲ့ဒီလိုတောင်းဆိုမှုတွေကြောင့်  အလုပ်ထုတ်ခံရတဲ့  အလုပ်သမားတွေရှိသလို အလုပ်သမားအခွင့်အရေး ချိုးဖောက်ခံနေရတာတွေလည်းရှိနေပါတယ်။

#MyanmarLabourNews 
#MinimumWage 
Photo-MyanmarPouChenUnion