မြန်မာနိုင်ငံမှ ထိုင်းနိုင်ငံသို့ အလုပ်အကိုင်ရရှိရန် အထောက်အထားမဲ့ဝင်ရောက်လာသူများများကို ထိုင်းအာဏာပိုင်တွေက ဖမ်းဆီးရာ ယခုလ ၁၅ ရက်ခန့်အတွင်း လူကုန်ကူး ပွဲစား ၁၄ ဦးနဲ့ ဖမ်းဆီးခံရသူ ၁၃၀၀ ကျော် ရှိတယ်လို့ သိရှိရပါတယ်။
အဆိုပါဖမ်းဆီးရမှုမှာ တာခ့်ပြည်နယ်၊ ပရာကျွတ်ခီရီပြည်နယ်၊ ချင်းရိုင်ပြည်နယ် နဲ့ အယုဒ္ဓယပြည်နယ် တို့မှာ ဖမ်းဆီးခံရသူများဖြစ်ပြီး အဖမ်းခံရသူများတွင် အသက်မပြည့်တဲ့ကလေးငယ်များလည်း ပါဝင်ပါတယ်။
ထိုင်းနိုင်ငံကို MoU စနစ်နဲ့ သွားရောက်လုပ်ကိုင်ခွင့်ရရန် မေလက စတင်ခွင့်ပြုခဲ့ပြီး ဖြစ်သော်လည်း
အလုပ်အကိုင်ရှာဖွေဖို့ လာကြတဲ့ မြန်မာတွေဟာ နေ့စဉ် အစုလိုက်အပြုံလိုက် အထောက်အထားမဲ့အဖြစ်
ဝင်လာနေကြဆဲဖြစ်ကာ နေစဉ်နီးပါး အဖမ်းခံနေရတယ်လို့ ရွှေ့ပြောင်းအရေး ဆောင်ရွက်သူတွေက
ပြောပါတယ်။
မြန်မာနိုင်ငံမှ ထိုင်းနိုင်ငံသို့ အထောက်အထားမဲ့ နေစဉ်နီးပါး ဝင်ရောက်နေမှုကြောင့် ထိုင်းနိုင်ငံထဲမှ တရားမဝင် ဝင်ရောက်လာသူများကို ထိန်းသိမ်းထားသော ယာယီထိန်းသိမ်းစခန်း (၃)ခုတွင် လူဉီးရေ သုံးထောင်နီးပါးမျှ ထိန်းသိမ်းခံထားရပြီး ယာယီထိန်းသိမ်းရေးစခန်းများနဲ့ ၎င်းတို့ကို ထိန်းသိမ်းထားရန် နေရာအခက်အခဲပင် ရှိနေကြောင်း ရွှေ့ပြောင်းအလုပ်သမားအရေး ဆောင်သူများက ပြောပါတယ်။
မြန်မာနိုင်ငံမှ ရွှေ့ပြောင်းအလုပ်သမားများကို MoU စနစ်နဲ့ မေလက (၉) ရက်နဲ့ (၁၁) ရက်တို့တွင်
အလုပ်သမား (၆၀၀) ခန့်ကို (၂) ကြိမ် နယ်စပ်ဂိတ်ပေါက်များမှ စတင်ပို့ဆောင်ခဲ့သော်လည်း လက်ရှိတွင်
ထပ်မပို့နိုင်သေးပါ။
မြန်မာနိုင်ငံမှ ထိုင်းနိုင်ငံသို့ MoU စနစ်နဲ့ အလုပ်သမားများ စေလွှတ်နိုင်ရေးအတွက် ခွင့်ပြုထားသော အေဂျင်စီများက ဌာနတွင် Demand Letter များ တင်ပြထားရာ ခွင့်ပြုချက်ကို စောင့်နေကြပြီး ထိုသို့ သွားရောက်လုပ်ကိုင်လိုသူ မြန်မာအလုပ်သမား သိန်းချီခန့် ရှိတယ်လို့ ဆိုပါတယ်။
မြန်မာနိုင်ငံတွင် ကိုဗစ် -၁၉ နဲ့ စစ်တပ်ရဲ့ တရားမဝင် အာဏာသိမ်းမှုကြောင့် အလုပ်အကိုင်အခွင့်အလမ်းများ သန်းချီ ဆုံးရှုံးကာ မြန်မာနိုင်ငံတွင် အလုပ်လက်မဲ့များ ပိုမိုများပြားလာတယ်လို့ နိုင်ငံတကာအလုပ်သမားအဖွဲ့အစည်းများနဲ့ နိုင်ငံတကာဖွံ့ဖြိုးရေးအဖွဲ့အစည်းတွေကထုတ်ပြန်ထားပါတယ်။
