အလုပ်သမားတဦးလျှင် တရက်အလုပ် ပျက်ပါက ရက်ပျက်ကြေး သုံးသောင်းအထိကောက်ခံနေပြီး၊ အလုပ်သမားဥပဒေပါ အခွင့်အရေးများဖြစ်တဲ့လုပ်သက်ခွင့်၊ ရှောင်တခင်ခွင့် ရယူခွင့်အပါအဝင်အခြားသောအခွင့်အရေးများကို စက်ရုံဖက်ကဘာတခုမှမပေးတဲ့အပြင် အလုပ်သမားတွေရဲ့အခွင့်အရေးတွေကို Dishang Kenny garment အထည်ချုပ်စက်ရုံဖက်က ပြောင်ပြောင်တင်းတင်းချိုးဖောက်နေတယ်လို့ အလုပ်သမားများရဲ့ပြောကြားချက်တွေအရသိရပါတယ်။
Dishang Kenny garment အထည်ချုပ်စက်ရုံဟာ မင်းကြီးမဟာမင်းခေါင်လမ်း၊ ရွှေသံလွင်စက်မှုဇုန်၊ လှိုင်သာယာမြို့နယ်၊ ရန်ကုန်မြို့မှာလာရောက်အခြေချလုပ်ကိုင်နေတဲ့ တရုတ်လူမျိုးပိုင်စက်ရုံတခုဖြစ်ပြီးတော့လုပ်သားဦးရေ ၅၇၀ နဲ့လည်ပတ်လုပ်ကိုင်နေတဲ့စက်ရုံတခုဖြစ်ပါတယ်။
"လုပ်ငန်းခွင်ထဲမှာအလုပ်ရှင်ကိုယ်စားအုပ်ချုပ်ရတဲ့စူပါနဲ့ အောစူပါတွေက အလုပ်သမားတွေကိုတော်တော်ရိုင်းရိုင်းစိုင်းစိုင်း ဆက်ဆံတာအရှက်ရအောင်ကို အော်ဟစ်ပြီးပြောတာ တနင်္ဂနွေ လိုရက်တွေကိုလဲအလုပ်သမားတွေရဲ့ ဆန္ဒမပါပဲ အိုတီအတင်းဆင်းခိုင်းတယ် မဆင်းရင် ဝမ်တိမ်ထိုးရတယ်"လို့အဆိုပါစက်ရုံမှအလုပ်သမားတဦးကဆိုပါတယ်။
ဒါ့အပြင်စက်ရုံဖက်က အလုပ်သမားဥပဒေများဖြစ်ကြသည့် ၁၉၅၁ ခုနှစ် ခွင့်ရက်နှင့်အလုပ်ပိတ်ရက်များဥပဒေပါခံစားခွင်များ လုံးဝမပေးတော့ပဲအလုပ်သမားများမှ ခွင့်ယူမည်ဆိုပါက ခွင့်ယူပြီးနောက်ရက်များတွင် လုပ်ငန်းခွင်သို့လာရောက်သည့်အခါ လိုင်းခေါင်းဆောင်များမှ အလုပ်သမားအပေါ်အငြိုးအတေးထား ဆက်ဆံ ခြင်း ဝမ်တိမ်လက်မှတ်ထိုးခိုင်းစေခြင်းအပြင် အလုပ်မှထုတ်ပယ်ခံရပါသည်အထိအလုပ်သမားများအပေါ် အခွင့်အရေးချိုးဖောက်နေတယ်လို့လည်းသိရပါတယ်။
"အရေးပေါ်မိသားစုကိစ္စဖြစ်လို့ ဖြစ်ဖြစ်လုပ်ငန်းခွင်ထဲရောက်မှ နေထိုင်မကောင်းရင်ပဲ ဖြစ်ဖြစ်ပြန်ချင်လဲ ဂိတ်ပတ်ကအလွယ်တကူတောင်းမရဘူး ပြီးတော့အလုပ်တရက်သာပျက်တာနဲ့ ရက်မှန်ကြေးဖြတ်တာအပြင် တရက်ပျက်တာနဲ့ပိုက်ဆံသုံးသောင်းတန်း ဖြတ်ပစ်တာ ခိုင်းတာကလဲည၁၀ ကျော်အထိခိုင်းတာဆိုတော့ဒီလိုကာလမှာအိမ်ပြန်ရတာတော်တော်အခက်အခဲတွေကြုံနေရတယ်"လို့ Dishang Kenny garment စက်ရုံမှ အလုပ် သမားတဦးကပြောပါတယ်။
အထက်ပါစက်ရုံမှအလုပ်ရှင်အနေဖြင့် စက်ရုံအတွင်းရှိ အလုပ်သမားများနားနေထမင်းစားဆောင်များကို သန့်ရှင်းမှု စီစဥ်ဆောင်ရွက်မှုမရှိတာတွေအပါအဝင် အလုပ်သမားများကို အလုပ်ရှင်၏ စီမံအုပ်ချုပ်ရေးအပိုင်းမှာတာဝန်ယူထားသော All super/Super များ မှ အလုပ်ချိန် နံနက်(၇း၃၀)အစား နံနက် (၇း၁၅) မှစ၍ အလုပ်သမားများအား လုပ်ငန်းခွင် ဝင်စေခြင်းနှင့် အစည်းဝေးများ ပြုလုပ်ခြင်းများကိုအလုပ်သမားများဆန္ဒမပါဘဲ နေ့စဥ်နဲ့အမျှပြုလုပ်နေတယ်လို့သိရပါတယ်။
လက်ရှိမှာတော့ Dishang Kenny garment Factory အထည်ချုပ်စက်ရုံက အလုပ်သမားတွေအနေနဲ့လုပ်ငန်းခွင်တွင် All super/Super များမှ အလုပ်သမားအပေါ် အလုပ်နဲ့မသက်ဆိုင်ဘဲ ရိုင်းစိုင်းစွာဖြင့် ပြောဆိုဆက်ဆံခြင်း နှင့် ဝန်ထမ်းများကြားအရှက်ရစေရန်အော်ဟစ်ပြောဆိုဆက်ဆံခြင်းများ မပြုလုပ်စေရန်၊ ဥပဒေပါခံစားခွင်များကို ဥပဒေပါမတိုင်းခံစားခွင်ပြုရန်နှင့်အပြည့်အဝပေးရန်၊ အများပြည်သူအလုပ်ပိတ်ရက်များဖြစ်သည့် တနင်္ဂနွေနေ့များကို အလုပ်ရှင်အနေဖြင့် အချိန်ပိုခေါ်သည့်အခါ အလုပ်သမားများ၏သဘောဆန္ဒ ကိုရယူပြီးမှသာခေါ်ရန်၊ အလုပ်သမားအနေဖြင့် လုပ်ငန်းခွင်တွင် နေထိုင်မကောင်းဖြစ်တဲ့အခါနှင့် မိမိ၏မိသားစုကိစ္စပေါ်ပေါက်လာပါက အလုပ်ရှင်နေဖြင့် ဂိတ်ပတ်ပေးရန်၊ ဥပဒေပါခံစားခွင့်ရက်ပြတ်ပါက အခြားလစာတိုင်းများထဲက မဖြတ်တောက်ရန်၊ အလုပ်ရှင်အနေဖြင့် အချိန်ပိုခေါ်ယူရာတွင် ဥပဒေမှ သက်မှတ်ထားသည်အတိုင်းခေါ်ယူရန်၊ စက်ရုံလုပ်ငန်းခွင်ရှိ ထမင်းစားဆောင်တွင် သန့်ရှင်းအောင်စီစဥ်ဆောက်ရွက်ပေးရန်၊ အလုပ်ချိန်အားယခင် သက်မှတ်ထားသော နံနက်(၇း၃၀) မှသာ လုပ်ငန်းခွင်သို့ ဝင်ရောက်ရန်အစရှိတဲ့အချက်(၈)ချက်ကိုအမြန်ဆုံးရရှိဖို့လိုလားနေကြပါတယ်။
Dishang Kenny garment Factoryအထည်ချုပ်စက်ရုံမှာအလုပ်သမားသမဂ္ဂရှိနေပေမယ့် စစ်အာဏာသိမ်းပြီးနောက်မှာတော့ အလုပ်သမားအခွင့်အရေးကိစ္စရပ်တွေကိုစက်ရုံဖက်ကညှိနှိုင်းတာတွေမရှိတော့ဘူးလို့လည်းသိရပါတယ်။
အဆိုပါအထည်ချုပ်စက်ရုံဟာ ZARA, ONLY, KIABI အစရှိတဲ့အမှတ်တံဆိပ် အထည်များချုပ်လုပ်ပြီးစျေးကွက်ကိုဖြန့်ချီနေတဲ့စက်ရုံတခုလည်းဖြစ် တယ်လို့သိရပါတယ်။
