အလုပ်သမားတွေဆီက လူမှုဖူလုံကြေးဖြတ်တောက်ပေမယ့် လူမှုဖူလုံရေးဆိုင်ရာဆေးခွင့်ယူပါက ခွင့်ပြုပေးတာမရှိသလို လူမှုဖူလုံရေးအကျိုးခံစားခွင့်တွေမရရှိဘူးလို့ ဧရာဝတီတိုင်းက အထည်ချုပ်အလုပ်သမားတွေကပြောပါတယ်။
ဒါ့အပြင် အလုပ်သမားတွေ ကို ခွင့်မပေးဖို့ လူမှုဖူလုံရေး ရုံးကို စက်ရုံဘက်ကနေ အကြောင်းကြားထားတာတွေရှိတယ်လို့ လည်း အလုပ်သမားတွေထံကသိရပါတယ်။
ဧရာဝတီတိုင်းဒေသကြီး၊ ပုသိမ်မြို့ ၊အမှတ် (၁၃)ရပ်ကွက်ရှိ Amava Apparel အထည်ချုပ်စက်ရုံ HR မှ အလုပ်သမားများဆေးခွင့်လာယူပါက မပေးရန် လူမူဖူလုံရေးသို့အကြောင်းကြားထားတယ်လို့သိရပါတယ်။
"ညီမတို့ နိုင်ငံတော်အသိအမှတ်ပြုလက်မှတ်ရ ဆရာဝန်မှတ်ချက်၊ လက်မှတ် ပါတာတောင် ဆေးခွင့်မပေးဘူး ။ ဘာဖြစ်လို့မပေးတာလဲလို့မေးကြည့်လိုက်တဲ့အခါမှာ စက်ရုံဘက်က ခွင့်မပေးဖို့ လှမ်းပြောထားလို့လို့ ပြောတယ် "လို့အဆိုပါစက်ရုံတွင် အလုပ်လုပ်နေသော ဝန်ထမ်းတစ်ဦးကပြောပါတယ်။
အဆိုပါစက်ရုံသည် သီရိလကာ်နိုင်ငံသားပိုင်ဖြစ်ပြီး အလုပ်သမား တစ်ထောင်ကျော်ဖြင့် Blaklader Brand ကိုချုပ်လုပ်နေတာဖြစ်တယ်လို့ သိရပါတယ်။
လူမှုဖူလုံရေးဥပဒေအရ မဖြစ်မနေ မှတ်ပုံတင်ရမဲ့ အလုပ်သမား(၅) ဦးနှင့်အထက် စီးပွားရေးလုပ်ငန်းတွေမှာ အလုပ်သမား အသစ်ခန့်ပြီးတိုင်း (၁၀) ရက်အတွင်း မဖြစ်မနေ မှတ်ပုံတင်ရန်လိုအပ်ပြီး အလုပ်သမားတစ်ဦးသည် လူမှုဖူလုံရေးအဖွဲ့တွင် အကျုံးဝင်မှတ်ပုံတင်ပြီးသည်နှင့် ဆေးကုသမှုခံယူခွင့်နှင့် ငွေကြေးအကျိုးခံစားခွင့် (၁၅) မျိုးကို မှတ်ပုံတင်ကာလနှင့် ထည့်ဝင်ကြေးကာလတွေပေါ်မှာ မူတည်ပြီး ခံစားခွင့်ရရှိနိုင်တယ်လို့ လူမှုဖူလုံရေး ဥပဒေအရ သိရပါတယ်။
