မတ်လက လုပ်ခဲ့တဲ့လုပ်ခလစာကိုစက်ရုံဖက်ကဝန်ထမ်းတွေရဲ့လစာထုတ်ရက်ရောက်မှ ၃၅ ရာခိုင်နှုန်းသာပေးတော့မယ်လို့ပြောလာတဲ့အတွက်ဆင်ဖြူတော်(C.K.J Myanmar)အထည်ချုပ်စက်ရုံကအလုပ်သမား၅၀၀ ကျော်ဟာ လုပ်ငန်းခွင်မဝင်ပဲ ၂ ရက်တာဆန္ဒပြနေရာကနေ ဒီကနေ့ဧပြီ ၇ ရက်နေ့မှာပဲလုပ်အားအပြည့်အဝပြန်လည်ရရှိသွားပြီလို့သိရပါတယ်။
အဆိုပါစက်ရုံဟာကိုရီးယားလူမျိုးတဦးလုပ်ကိုင်နေတဲ့အထည်ချုပ်စက်ရုံဖြစ်ပြီးရန်ကုန်တိုင်း၊ သန်လျင်မြို့နယ်၊ သမဝါယမှတ်တိုင်အနီးမှာလုပ်သား ၅၀၀ နီးပါးနဲ့လည်ပတ်နေတဲ့စက်ရုံတခုဖြစ်ပါတယ်။
"သူတို့ဖက်ကကျန်တာကိုဘယ်နေ့ဘယ်ရက်ပေးပါမယ်လို့အစောကြီးထဲကပြောရင်ဒါမျိုးမဖြစ်ဖူးလစာထုတ်ရက်မှ ၃၅ ရာခိုင်နှုန်းပဲပေးနိုင်မယ်ပြောလို့ဖြစ်ရတာခုတော့လစာအပြည့်ပြန်ရပါပြီ"လို့အဆိုပါစက်ရုံမှအလုပ်သမားတဦးက MLN ကိုပြောပါတယ်။
လုပ်ခလစာဖြတ်တောက်ခံရတဲ့အပေါ်အလုပ်သမားတွေဖက်ကလုပ်ငန်းခွင်မဝင်ဘဲ ဆန္ဒပြနေတဲ့အပေါ်မှာလဲစက်ရုံဖက်ကအလုပ်သမားတွေကိုခြိမ်းခြောက်နေတာတွေရှိခဲ့တဲ့အပြင်ဆန္ဒပြတဲ့ရက်တွေအတွက်လုပ်ခလစာမပေးဖူးလို့ပြောခဲ့တာတွေရှိတယ်လို့လဲအလုပ်သမားတွေကပြောပါတယ်။
"နင်တို့ကိုဒေးကြေးကျွမ်းကျင်ကြေးတွေဖြတ်ပစ်မယ်ပြောတယ် ကျမတို့ကတော့အရင်လစာတောင်မရှင်းသေးတာဘာလို့လုပ်ရမှာလဲဆိုပြီးတော့ကိုပေပြီးဆန္ဒပြခဲ့တာ အဲ့ဒါဖြတ်လားမဖြတ်လားနောက်လစောင့်ကြည့်ရမှာပေါ့"လို့အလုပ်သမားတဦးကထပ်ပြောပါတယ်။
အဆိုပါစက်ရုံမှာသမဂ္ဂရှိပေမယ့်ယခုလက်ရှိအနေအထားမှာ အငြင်းပွားမှုတွေ ဖြစ်ပေါ်ပါက ဘယ်လိုမှကူညီခွင့်မရဖြစ်နေတယ်လို့အလုပ်သမားတွေဖက်ကပြောပါတယ်။
လက်ရှိအနေအထားမှာတော့ဆင်ဖြူတော် အထည်ချုပ်စက်ရုံမှလုပ်ခလစာအပြည့်မပေးချေနိုင်တဲ့အတွက်တခြားစက်ရုံတခုမှဝန်ထမ်းလစာငွေအကူအညီပေးမယ်လို့ကြားသိနေရပေမယ့်အလုပ်သမားတွေအနေနဲ့စက်ရုံဖက်ကအပြည့်ပေးချေမှု့ရှိမရှိကိုလက်ရှိအချိန်အထိလုပ်ငန်းခွင်မဝင်သေးဘဲ ဆက်လက်စောင့်ကြည့်ခဲ့ပြီးတော့ဒီကနေ့ညနေပိုင်းမှာပဲလစာအပြည့်အဝရရှိခဲ့တာလို့သိရပါတယ်။
ဆင်ဖြူတော်(CKJ) အထည်ချုပ်စက်ရုံဟာ Export အထည်တွေ၊အပါးထည်တွေချုပ်လုပ်ပြီးစျေးကွက်ကိုပြန်လည်တင်ပို့နေတဲ့စက်ရုံတခုလဲဖြစ်တယ်လို့သိရပါတယ်။
