ယမန်နေ့ကစပြီး လုပ်ခလစာမရရှိတဲ့အတွက်ဆန္ဒပြနေကြတဲ့ရွှေလင်ဗန်းစက်မှု့ဇုန်ထဲက ကျားဖြူ CSG အထည်ချုပ်စက်ရုံအလုပ်သမားတွေဟာဒီကနေ့မှာပဲလုပ်ခလစာအပြည့်အဝပြန်လည်ရရှိခဲ့ပြီလို့သိရပါတယ်။
"ဒီနေ့တော့အပြည့်ပြန်ရတယ် ဒီစက်ရုံကသူဌေးရှိရင်အဲ့လိုမဖြစ်ဖူးသူဌေးမရှိတဲ့အချိန်တွေဆိုအဲ့လိုပဲ ခနခနဖြစ်တာ ကျမတို့လဲသကြ်န်ပိတ်ရက်နဲ့အဆောင်ခပေးရမှာနဲ့အခက်အခဲတွေရှိတာကိုသူတို့ကအပြည့်မပေးဘဲ တယောက်ကို ၇ သောင်းလောက်ပဲပေးမယ်လုပ်လို့အခုလိုဖြစ်တာ"လို့ အဆိုပါ စက်ရုံက အလုပ်သမားတစ်ဦးက Myanmar Labour News ကိုပြောပါတယ်။
အဆိုပါကျားဖြူ အထည်ချုပ်စက်ရုံဟာလုပ်သားဦးရေ ၁၀၀၀ ဝန်းကျင်လောက်နဲ့လည်ပတ်လုပ်ကိုင်နေတဲ့စက်ရုံဖြစ်ပါတယ်။
မတ်လအတွက်လုပ်ခလစာအပြည့် မပေးတဲ့အတွက်စက်ရုံကအလုပ်သမားတွေကယမန်နေ့ကပဲစက်ရုံတွင်းဆန္ဒထုတ်ဖော်ခဲ့ကြတယ်လို့သိရပါတယ်။
"ဆန္ဒပြနေရင်းညလောက်ကျတော့ ရဲတွေသေနတ်တွေနဲ့ရောက်လာတယ် သူတို့ညှိပေးမယ်ပြောပြီးအပေါ်မှာတက်ညှိကြတယ်ပေါ့ဘာမှတော့မဖြစ်သွားပါဘူး"လို့အလုပ်သမားတဦးကထပ်ပြောပါတယ်။
ယမန်နေ့အလုပ်ဆင်းချိန်လောက်ကစပြီးလုပ်အားခမရရှိတဲ့အလုပ်သမားတွေဟာစုပေါင်းဆန္ဒပြနေကြပြီးတော့ ည၈နာရီကျော်လောက်မှာပဲစက်ရုံထဲကိုစစ်ကောင်စီတပ်သားတွေဝင်ရောက်လာခဲ့တာဖြစ်ပါတယ်။
"မနေ့ကသူတို့ကယောကျာ်းလေးဆယ်ယောက်လောက်ထားခဲ့ ပြန်တော့ပြောတာအဲ့ဒါကျမတို့ကယောကျာ်းလေးတွေတခုခုဖြစ်မှာစိုးလို့အဲ့ဒါနေခဲ့တာပါ"လို့အလုပ်သမားတဦးကပြောပါတယ်။
ကျားဖြူအထည်ချုပ်စက်ရုံဟာ C & P အမှတ်တံဆိပ်ဘောင်းဘီ၊ အင်္ကျီတွေချုပ်လုပ်တင်ပို့နေတာ ဖြစ်တယ်လို့ သိရပါတယ်။
ယခုလက်ရှိအချိန်မှာစက်ရုံတွေဖက်ကလုပ်သားတွေရဲ့လုပ်ခလစာမပေးချေတာတွေ၊လုပ်သားအခွင့်အရေးဥပဒေမဲ့ချိုးဖောက်တာတွေကြောင့်အလုပ်သမားတွေဖက်ကဥပဒေပါအခွင့်အရေး၊ လူမှု့ဖူလုံရေးအကျိုးခံစားခွင့်တွေရရှိဖို့မကြာခဏဆိုသလိုစက်ရုံတွင်းဆန္ဒပြတောင်းဆိုတာတွေရှိနေသလိုအလုပ်ရှင်တွေဖက်ကစစ်တပ်နဲ့ခြိမ်းခြောက်နေတာတွေလဲရှိနေပါတယ်။
အလုပ်သမားတွေရဲ့ သတင်းပေးပို့ချက်အရ ယခုဧပြီလထဲမှာ လုပ်ခလစာမရှင်းပေးလို့ စက်ရုံတွင်းဆန္ဒထုတ်ဖော်မှု့ ၂ ကြိမ်ဖြစ်ပွားသွားခဲ့ပါတယ်။
