ဂျက်စတင်မင်းဟိန်း(လိင်စိတ်ခံယူမှု့ကွဲပြားသူများသမဂ္ဂ-မန္တလေး)နှင့်တွေ့ဆုံမေးမြန်းခြင်း။
လက်ရှိဖြစ်ပေါ်နေတဲ့မန္တလေးမြို့ပေါ်စစ်အာဏာရှင်ဆန့်ကျင်ရေးလှုပ်ရှားနေတဲ့မြေပြင်သပိတ်တွေရဲ့အခြေအနေနဲ့LGBTသပိတ်စစ်ကြောင်းတွေရဲ့အခြေအနေတွေအပေါ်ပြည်သူများသိသင့်တဲ့ အခြေအနေကို Myanmar Labour News အနေနဲ့ LGBT Union Mandalay မှ ကိုဂျက်စတင်မင်းဟိန်းနှင့်တွေဆုံမေးမြန်းကာကောက်နှုတ်ဖော်ပြပေးလိုက်ပါတယ်။
မေး - မန္တလေးမြေပြင်သပိတ်တွေ့ရဲ့လက်ရှိလှုပ်ရှားမှု့အခြေအနေဘယ်လိုရှိနေလဲ။
ဖြေ- လက်ရှိကမြေပြင်မှာသပိတ်တွေရှိနေအုံးမှာပဲ ကျတော်တို့ LGBTစစ်ကြောင်းဆိုအရင်က၂ခါဆိုပေမယ့်ခုတလတခါလောက်ပဲမြေပြင်အခြေအနေအရလှုပ်ရှားနိုင်တော့တယ် ဘာလို့လဲဆိုတော့သပိတ်မှာပါဝင်တဲ့သူတချို့လက်နက်ကိုင်တော်လှန်ရေးဖက်ကူးပြောင်းသွားတာမျိုးတွေရှိတယ် ပြီးတော့စစ်တပ်ကသပိတ်လုပ်ပြီးသွားရင်အဲ့နေရာကအိမ်တွေဝင်ရှာတာ ဝင်ဖမ်းတာတွေလုပ်လာတာတွေရှိလာတော့လုပ်ရတာနဲနဲကျပ်လာတဲ့သဘောလောက်တော့ရှိပေမယ့် သူတို့မှာလဲသူတို့ဗျူဟာရှိသလိုကျတော်တို့မှာလဲကျတော်တို့ဗျူဟာရှိပါတယ်။
မေး- သပိတ်တိုက်ပွဲတွေလုပ်တဲ့အခါမြေပြင်အခက်အခဲတွေအနေနဲ့ဘာတွေရှိနေလဲ။
ဖြေ-အိမ်အခက်အခဲရှိတယ်လို့တော့ပြောရမှာပဲ safe house ပေါ့နော် အကုန်လုံးကအိမ်ကဆင်းပြီးအလုပ်လုပ်နေရတာဆိုတော့၊ ပြီးတော့ safe house တိုင်းကလဲအရမ်းငှားလို့မရဘူး ဒလန်အိမ်လားစစ်တပ်ထောက်ခံတဲ့သူတွေလားဆိုတာချိန်ရသေးတယ်၊ ပြီးတော့ပွဲစားတွေကသပိတ်မှာပါတဲ့သူမှန်းသိရင်စျေးပိုတောင်းတယ် အိမ်ရှင်တွေကရောတသိန်းဆိုနှစ်သိန်းပေးနေရတာ ဒါပေမယ့်ဒီကာလမှာတော့မချစ်သော်လည်းအောင့်နမ်းနေရတာပေါ့ ဒီလူတွေကို၊ ပြီးတော့နောက်တခုကစားရေးသောက်ရေးကလဲတော်တော်အခက်အခဲရှိကြတယ်သပိတ်တိုက်ပွဲတွေမှာပါဝင်တဲ့သူတွေအားလုံး။
မေး-စစ်ကောင်စီကထောင်ချောက်ဆင်ဖမ်းဆီးတာတွေရှိလာတယ်ဆိုတော့လုံခြုံရေးအခြေအနေကအဆင်ပြေရဲ့လား။
ဖြေ- ဒါကတော့ဧပရယ်နောက်ပိုင်းမှာကြုံလာရတဲ့အခြေအနေပါ ကျတော်တို့ဆိုလဲသပိတ်မှာပါတဲ့ကလေးတယောက်ကိုမိသွားပြီးအိမ်လိုက်ပြခိုင်းလို့ပြေးခဲ့ရတာရှိတယ် ဒါမျိုးတွေရှိလာတော့ကိုယ့်လုံခြုံရေးအတွက်တော့ကိုယ်ပြင်ဆင်ထားရတာပေါ့။
မေး-တိုက်ပွဲတွေကလဲနောက်ပိုင်းပိုပြင်းထန်လာမှာဆိုတော့မြေပြင်သပိတ်တွေအနေနဲ့လှုပ်ရှားမှု့အခြေအနေကဘယ်လိုရှိလာမလဲ။
ဖြေ-တော်လှန်ရေးကရေချိန်မြင့်လာတယ် စကစဖက်ကလဲသူတို့ဗျူဟာအတိုင်းအတင်းဝင်ရှာတယ် ဖမ်းတယ်မြေပြင်မှာတော့လှုပ်ရှားရတာကျပ်တည်းလာတာအမှန်ပဲ တကယ်လို့စစ်ရေးအခြေအနေဒီ့ထက်ပိုပြင်းလာပြီဆိုရင် ကျတော်တဦးထဲသဘောဆန္ဒကတော့ထောက်ပို့ဖြစ်ဖြစ်လက်နက်ကိုင်ပြီးဝင်တိုက်တာပဲဖြစ်ဖြစ်လုပ်သွားမှာပါ။
မေး-လက်ရှိ LGBT တွေကိုစစ်ကောင်စီကစစ်ကြော ရေးလိုနေရာတွေမှာအညှိုးထားနှိပ်စက်နေတာမျိုးတွေရှိနေတဲ့အပေါ်ဘာပြောချင်လဲ။
ဖြေ-သူတို့ပညာမတတ်လို့လုပ်နေတာလို့ပဲမြင်တယ်၊ အသိဉာဏ်ရှိတယ်ဆိုရင်ခုလိုစကစအောက်မှာကျွန်ခံနေမှာတောင်မဟုတ်ဖူးလို့ပြောရမယ်။သူတို့ကကျတော်တို့ LGBT တွေမှမဟုတ်ဖူး ဘာသာခြားတွေ ဘုန်းကြီးတွေကအစလိင်ပိုင်းဆိုင်ရာစော်ကားတာတွေလုပ်တာ ကျတော်တို့ကတော့ LGBT မှမဟုတ်ဖူး ဒီလိုလိင်ပိုင်းဆိုင်ရာအကြမ်းဖက်မှု့တွေလုပ်လာပြီဆိုရင်ဘယ်သူ့ကိုမဆိုကန့်ကွက်သွားမယ်။
မေး- နိုင်ငံရေးတက်ကြွလှုပ်ရှားသူတယောက်အနေနဲ့ရောလိင်စိတ်ကွဲပြားမှု့ခံယူထာားသူတယောက်အနေနဲ့ရော ပြည်သူတွေကိုပေးချသ်တဲ့သတင်းစကားကဘာဖြစ်မလဲ။
ဖြေ- ကျတော်တို့ LGBT တွေအနေနဲ့ ခြောက်လဲမကြောက်ဖူး အခြောက်တရားမှာအကြောက်တရားမရှိဆိုတဲ့စကားအတိုင်းပဲစစ်အာဏာရှင်အမြစ်ပြတ်ရေးကို ဒုတ်ရရ ခဲရရ အဆုံးအထိတော်လှန်သွားမယ် ပြီးတော့ပြည်သူတွေကိုလဲကျတော်တို့ LGBT တွေအပေါ်ဒီကာလမှာရောတော်လှန်ရေးအလွန်ကာလတွေမှာရေ ာဒီ့ထက်ပိုနားလည်ပေးဖို့မျှော်လင့်တယ် တခြားသောLGBTတွေအနေနဲ့လဲဒီတိုက်ပွဲဟာစစ်အာဏာရှင်ကျဆုံးရေးတင်မကပဲငါတို့အပေါ်ပြည်သူတွေဒီံထက်ပိုပြီးအတွေးအမြင်ပြောင်းသွားနိုင်တယ်ဆိုတဲ့အတွေးနဲ့ဒီ့ထက်ပိုပြီးပါဝင်ပေးကြဖို့တိုက်တွန်းချင်ပါတယ်။
ခုလိုဖြေကြားပေးတဲ့အတွက် Myanmar Labour News ကကျေးဇူးတင်ပါတယ်။
