ရန်ကုန်တိုင်း၊ မှော်ဘီမြို့နယ်၊ မြောင်းတကာစက်မှုဇုန် ဟန်စတီးပါဝါလမ်းက Wonderful Apparel အထည်ချုပ် စက်ရုံကပါ ။ အလုပ်သမားတဦးပါ ။ ဌာနတော့ မပြောပါရစေနဲ့။
စက်ရုံမှာ အောလင်းတွေ အဆမတန် ဆင်းခိုင်း နေပါတယ် ။ မဆင်းရင်လဲ အောစူပါက လိုင်းသားတွေကို လူအများကြား အော်ဟစ်ပြောဆို ပါတယ် ။ အောလင်းဆင်းရလည်း အိုတီကြေးလုံးဝမရဘဲ ၊ လုပ်ခမရဘဲ ရက်စား ဆင်းပေး ရတာပါ ။
အရင်က တိုင်တန်းသူတွေရှိလို့ အလုပ်သမားရုံးတွေက လာစစ်လည်း စက်ရုံဘက်က ရွေးထားသူတွေပဲ ဖြေခိုင်း ပါတယ် ။
အခန်းထဲမှာ အလုပ်သမားရုံးက လူကြီး မေးလို့ စာရွက်ထဲမှာ ဖြေရပေမဲ့ ၊ အဲဒီ ရေးခဲ့တဲ့ စာတွေက အမှန်တွေ မဟုတ်ပါဘူး။ စက်ရုံဘက်ကို ပြန်လှည့်ကြည့်ပေးပါဆိုပြီး မန်နေဂျာက အလုပ်သမားတွေကို ပြောနေလို့ အမှန် မဟုတ်တာတွေကို ရေးခဲ့ရတာပါ ။
“တိုင်ရင် စားပေါက်ပိတ်မှာ” လိုလည်း အလုပ်သမားတွေကို စက်ရုံလူကြီးတွေက ခြိမ်းခြောက်ပြောဆိုပါတယ် ။
အချိန်ပို ဆင်းဖို့ သဘောတူတဲ့ လက်မှတ်တွေကို အရင်ထိုးခိုင်းပြီး အဲ့နေ့ ညနေမှာပဲ ထမင်းဖိုးပေးပြီး တခါတည်း ဆင်းခိုင်းတာပါ။ ငြင်းချိန်လည်း မရပါဘူး ။
အချိန်ပို ဆင်းခိုင်းတာက စက်ရုံ အလုပ်သမားတွေရဲ့ သဘောတူညီတာ မဟုတ်ဘဲ၊ အောစူပါတွေ၊ စက်ရုံမှူးတွေ Meeting လုပ်ပြီး စူပါတွေကို ပြောပါတယ် ။ စူပါတွေက တဆင့် အလုပ်သမားတွေကို မဖြစ်မနေ အချိန်ပို ဆင်းဖို့ ပြောတာပါ။
အချိန်ပိုဆင်းဖို့ လက်မှတ် တခါတလေ မထိုးတဲ့သူကို စူပါတွေက ခေါ်ပြီး လူအများရှေ့မှာ အရှက်ရတဲ့အထိ အော်ဟစ် ပြောဆိုပါတယ်။
(၇ ရက်နေ့) အမျိုးသားနေ့ကနေ ၁၀ ရက်နေ့ တနင်္ဂနွေအထိ ၄ ရက် စက်ရုံ ပိတ်ခဲ့ပါတယ်။ အဲဒီပိတ်ရက်တွေ အတွက် ရက်စားကို ဒီဇင်ဘာ ၃ ရက် တနင်္ဂနွေနေ့မှာ ဆင်းပေးခဲ့ ရပါတယ်။ အဲဒီလ ၆ ရက်မှာ လည်း အောလင်း ဆင်းပေးခဲ့ရပါတယ်။ အိုတီကြေးမရခဲ့ပါ ။ အလုပ်ချိန် ဖလှယ်ပြီး ဆင်းခိုင်းခဲ့တာပါ ။ အဲဒီ ရက်တွေအတွက် သဘောတူညီမှုလက်မှတ်ကိုတွေကို အလုပ်ကို အရင်ဆင်းခိုင်းပြီး ထိုးခိုင်းခဲ့ပါတယ်။
စနေနေ့တွေမှာလဲ ညနေ ၆ နာရီခွဲအထိ ဆင်းပေးခဲ့ရပါတယ် ။ ဇန်နဝါရီ ၆ ရက်မှာလည်း အောလင်း ဆင်းပေးခဲ့ရပါတယ် ။ အဲ့ဒီ အောလင်းက နောက်တပတ် ဇန်နဝါရီ ၁၃ ရက် စနေအတွက် ဆင်းပေးခဲ့ရတာပါ ။ အချိန်ပိုခ မရပါ။
ဇန်နဝါရီ ၁၀ ရက် ဗုဒ္ဓဟူးနေ့မှာလည်း နောက်တကြိမ် အောလင်းဆင်းခဲ့ရပါတယ်။ အဲဒါကတော့ ဇန်နဝါရီ ၁၂ ရက် သောကြာနေ့အတွက် ဆင်းပေးခဲ့ရတာပါ။ အချိန်ပို အိုတီကြေး တပြားတချပ်မှ မရခဲ့ပါ ။ စက်ရုံက ဇန်နဝါရီ ၁၁ ရက်ကနေ ၁၄ ရက်အထိ ၄ ရက်ပိတ်ခဲ့ပါတယ်။
အလုပ်သမားတွေက ရက်စားဆင်းပေးနေရတာတွေကို လုံးဝ သဘောမတူပါဘူး။ စက်ရုံဘက်က ဖိအားပေး ဥပဒေ ဖောက်ဖျက်နေပေမဲ့ မလွန်ဆန်နိုင်လို့ လက်မှတ်ထိုးကြရတာပါ ။ (ဒီကနေ့) ဇန်နဝါရီ ၂၀ ရက် စနေနေ့မှာ အောလင်းဆင်းတာကလည်း နောက်တပတ် စနေ့နဲ့အတွက်လို့ ပြောနေပါတယ်။ အလုပ်သမားတွေရဲ့ သဘော ဆန္ဒကို လုံးဝ မေးမြန်းတာမရှိပါဘူး။
အစားထိုးရက် မဆင်းရင်လည်း ရက်မှန်ကြေးပြုတ်မှာမို့ ဆင်းပေးနေရတာပါ။
အော်ဒါပါးတယ်ဆိုပြီး စနေနေ့တွေ ပိတ်ရင်လည်း၊ ပြန်ဆင်းရတဲ့ အချိန်ပိုတွေထဲက တစ်ရက်ကို ၂နာရီနှုန်းနဲ့ အစား ပြန်ပေးရပါတယ် ။ အလုပ်ထွက်ရင်လည်း တလ အပြည့်ဆင်းထားရင်တောင် ရက်စားအတွက် ပိုက်ဆံ ဖြတ်ပါတယ် ။
ချုပ်နေတဲ့ လေဘယ်တို့ ၊ ကြယ်သီးတို့ပျောက်ရင်လည်း လျော်ရပါတယ်။ ပိုက်ဆံပေးပြီး လျော်ရတာပါ ။ ဒါကြောင့် အကူအညီတောင်းပါတယ် ။ အားလုံးသိဖို့ တင်ပြပေးပါ ။
(Wonderful Apparel စက်ရုံကတော့ မှော်ဘီမြို့နယ်၊ မြောင်းတကာ စက်မှုဇုန်၊ ဟန်စတီးပါဝါလမ်းမှာ ဖွင့်လှစ်ထားတာဖြစ်ပြီး လုပ်သားအင်အား (၄၅၀) ကျော်နဲ့ လည်ပတ်နေ ပါတယ်။ စက်ရုံက KIABI၊ TROLLKIDS၊ JACKET စတဲ့ အမှတ်တံဆိပ်တွေ ချုပ်လုပ်နေပြီး အလုပ်သမားသမဂ္ဂ ဖွဲ့စည်း မထားဘဲ လုပ်ငန်းခွင်ညှိနှိုင်းရေးကော်မတီ WCC ကိုတော့ ဖွဲ့စည်းထားတယ်လို့ သိထားပါတယ်။)
