အလုပ်သမားတွေကို ဒေးကြေး အမြင့်ဆုံး (၇၀၀၀) အနိမ့်ဆုံး (၅၂၀၀)ကျပ်ကို မကြာသေးခင်အချိန်က တိုးမြှင့်ထားပြီး ဒေးကြေးမတိုးခင်က သတ်မှတ်ထားတဲ့ ကျွမ်းကျင်ကြေးများကို အလုပ်ရှင်ဘက်က လျော့ချလိုက်တာကြောင့် ယခင်ရရှိတဲ့လစာထက်လျော့နည်းသွားလို့ အခက်တွေ့နေတယ်လို့ လှိုင်သာယာမြို့နယ် ရွှေသံလွင် စက်မှုဇုန် ၄ မှာဖွင့်လှစ်ထားတဲ့ S-M MYANMAR Garment CO,LTD အထည်ချုပ်စက်ရုံလုပ်သားတွေကပြောပါတယ်။
ကျွမ်းကျင်ကြေးအဖြစ် A++(၉၀၀၀၀)၊ A+(၇၀၀၀၀)၊ A (၅၀၀၀၀)၊ B( ၃၀၀၀၀)၊ C (၂၀၀၀၀) ကျပ်ရရှိသော်လည်း လစာတိုးပေးပြီးသောအခါ ကျွမ်းကျင်ကြေးများကို A++၊ A+၊ A အဆင့်သမားများမှာ (၂၀၀၀၀) ကျပ်၊ B,C အဆင့်သမားများကို (၁၀၀၀၀) ကျပ်အဖြစ်သို့ ဂရိတ်ကြေးများကို လျော့ချပြီး ပေးခြင်းကြောင့် အလုပ်သမားများ လစာလျော့နည်းသွားတာကြောင့် အဆင်ပြေမှုမရှိဘူးလို့အလုပ်သမားတွေကပြောပါတယ်။
တရုတ်နိုင်ငံသားပိုင်ဖြစ်ပြီး အလုပ်သမား ၂၀၀ ဝန်းကျင်နဲ့ mayorl အမှတ်တံဆိပ်ချုပ်လုပ်နေတာလို့ သိရပါတယ်။
လုပ်ငန်းခွင်ထဲမှာ အလုပ်သမားများ၏ ဥပဒေပါခံစားခွင့် ခံစားခွင့်ဖြစ်သော ရှောင်တခင်ခွင့်၊ လူမှုဖူလုံရေးဆေးခွင့်များကို ခံစားခွင့်မပေးခြင်း၊ ထိုခံစားခွင်မပေးသည့်အပြင် အလုပ်သမားများ အလုပ်တစ်ရက်ပျက်ပါက ဒေးကြေး (၇၀၀၀) ကျပ်၊ (၅၂၀၀)ကျပ်၊ ရက်မှန်ကြေး (၂၀၀၀၀)ကျပ်၊ အလုပ်သမားလစာထဲမှ ဖြတ်တောက်ခံရတာဖြစ်တယ်လို့ ဆိုပါတယ်။
"အလုပ်သမားတွေဘက်က တခါတလေ နေမကောင်းလို့ အလုပ်ပျက်တာမျိုးကိုမလိုချင်ဘူးလို့ ပြောတယ် ခွင့်ယူတာနဲ့ အလုပ်ထွက်ရမယ်လို့ ဖိအားပေးတယ်"လို့ အမည်မဖော်လိုတဲ့အလုပ်သမားကပြောပါတယ်။
လုပ်ငန်းခွင်ထဲတွင် အလုပ်သမားများ မချုပ်လုပ်နိုင်သော စံချိန်များကို မတရားတောင်းခံခြင်း၊ စက်လိုင်းတစ်လိုင်းထဲတွင် စူပါ၊ အလုပ်သမား (၄၀) ရှိပြီး လိုင်းပေါက်အထည်ထွက် (၃၅) ထည်ပေးရခြင်း၊ အဆိုပါ အနွေးထည်အထည်များမှာ ချုပ်လုပ်ရသည့်မှာ ခက်ခဲခြင်း၊ ချုပ်လုပ်သူ လူနည်းခြင်းကြောင့် အိမ်သာမသွား၊ ရေမသောက်ဘဲ အထည်ပြည့်မှီရန် အသဲအသန်ချုပ်လုပ်ရခြင်း၊ ထိုသို့ချုပ်လုပ်ရာတွင် အလုပ်ရှင်ဘက်မှ စံချိန်တောင်းသလောက်မပေးနိုင်သော အလုပ်သမားများကို "အလုပ်မလာနဲ့တော့"ဟုပြောပြီး ဖိအားပေးခိုင်းစေတာတွေရှိတယ်လို့ ဆိုပါတယ်။
"စံချိန်မပေးနိုင်တဲ့အလုပ်သမားကို အောစူပါ စူပါတွေက ဆဲဆိုတာတွေ ဂုဏ်သိက္ခာမရှိအောင် အော်ဟစ်ပြောဆိုတာတွေ နေ့တိုင်းလုပ်ပါတယ် အထည်စံချိန်မပေးနိုင်ဘူးဆိုရင် မိမိဆန္ဒနဲ့အလုပ်ထွက်ရပါတယ်"လို့ အမည်မဖော်လိုတဲ့အလုပ်သမားကပြောပါတယ်။
လုပ်ငန်းခွင်ထဲမှာ အလုပ်သမား သမဂ္ဂဖွဲ့စည်းထားတာမရှိဘူးလို့ ဆိုပါတယ်။
အလုပ်သမားတွေအနေနဲ့ ခံစားခွင့်ရှိသော ခွင့်များပေးရာတွင် ခွဲခြားဆက်ဆံပြီး မပေးရန်၊ အလုပ်ရှင်မှ လျော့ချလိုက်သော ဂရိတ်ကြေးကို ယခင်အတိုင်းပြန်းပေးရန်၊ အောစူပါ၊ စူပါများမှအလုပ်သမားများကို ဆဲဆိုခြင်း မပြုလုပ်ရန်နှင့်လုံခြုံရေးများမှ အော်ဟစ်ဆဲဆိုခြင်း မပြုလုပ်ရန်၊ လစာထုတ်ပေးရာတွင် အလုပ်ချိန်ထဲတွင်သာ လစာထုတ်ပေးရန်၊ အလုပ်သမားချုပ်လုပ်နိုင်သော စံချန်ကိုသာတောင်းခံရန်စတာတွေ တောင်းဆိုလိုတယ်လို့ အလုပ်သမားတွေကပြောဆိုပါတယ်။
#MyanmarLabourNews
