New Plus အထည်ချုပ်စက်ရုံမှာ အထည်စံချိန်ပြည့်မီဖို့ နားချိန်မှာ အပြည့်အဝ အနားမရဘဲ ချုပ်ပေးရတယ်လို့ အလုပ်သမားတွေက ပြောပါတယ်။ အထည်ချိန် စံချိန်မပြည့်ပါက ကြီးကြပ်ရေး ခေါင်းဆောင်တွေရဲ့ ဖိအားပေး ပြောဆိုတာကြောင့် နားချိန်တွေမှာ မနားနိုင်ဘဲ ချုပ်လုပ်နေရတာလို့ ပြောပါတယ်။
"ထမင်းစားနားချိန်က နာရီဝက်၊ ဒါပေမဲ့ ထမင်း ကိုအမြန်စားပြီး လိုင်းထဲ ပြန်ဝင်ချုပ်ရတယ်။ တချိုတွေဆို ထွက် မစား နိုင်တော့ဘူး။ မနားဘဲ ဆက်ပြီး ချုပ်ကြတာတွေလည်း ရှိတယ်။ အထည်မပေးနိုင်ရင် အပြောခံရမှာ စိုးရိမ် ကြတယ်။ တချိုခေါင်းဆောင်တွေဆို နင်တို မြန်မြန်စားပြီး ပြန်ဝင်ချုပ် ဆိုပြီး တောင်ပြောတယ်။ စက်ရုံက စံချိန်မတရားတောင်းတယ်။ ခေါင်းဆောင်တွေကလည်း မပေးနိုင်ဘူးလို့ မငြင်းဘူး။ ပေးနိုင်တယ် ပြောပြီး စက်သမားတွေကို ဖိခိုင်းတယ် ။” လို့ အလုပ်သမားတွေက ပြောပါတယ်။
အချိန်ပိုလုပ်ကိုင်ရလို့ မုန့်စားနားချိန် နာရီဝက် ပေးထားပေမဲ့ အထည်ချုပ်အလုပ်သမားတွေမှာ စံချိန်ပြည့်ဖို့ မုန့် ထွက်မစားနိုင်သလို သန့်စင်ခန်းဝင်တာ ကြာမြင့်တယ်ဆိုပြီး ကြီးကြပ်ရေးမှူးတွေရဲ့ ပြောဆိုတာလည်း ခံရတယ် လို့ အလုပ်သမားတွေက ပြောပါတယ်။ အထည် စံချိန်ပြည့်လို့ စက်သမားတွေရတဲ့ ငွေပမာဏထက် ၃ဆကို ကြီးကြပ်ရေး ခေါင်းဆောင်တွေရရှိပြီ လကုန်မှာ ဆုကြေး သီးသန့်ပေးမယ်ဆိုပြီး ပြောဆိုနေတယ်လို့ ပြောပါတယ်။
“အခုလဲ တလ စံချိန်ပြည့်ရင် စူပါက ဘောက်စူး ၅သိန်း နဲ့ အောစူပါက iphone တစ်လုံး ပေးမယ် ဆိုပြီး စက်ရုံ မှူးက ပြောတယ်။ ခေါင်းဆောင်တွေက သူတို ရဖို့ အလုပ်သမားတွေကို ဖိခိုင်းတော့တာ၊ အကျိုးခံစားခွင့်က သူတို့ကပဲ ရနေတာ။’ လို့ အလုပ်သမားတွေက ပြောပါတယ်။
New Plus အထည်ချုပ်စက်ရုံက သာဓုကန် စက်မှုဇုန်မှာ အလုပ်သမား ၁၀၀၀ နီးပါး လုပ်ကိုင်နေတဲ့ တရုတ်နိုင်ငံသားပိုင် အထည်ချုပ်စက်ရုံ ဖြစ်ပါတယ်။
