NEWS

J-Land Myanmar အထည်ချုပ်စက်ရုံ ညွှန်ကြားချက်အရ ဆိုကာ လုပ်ခ လျှော့ချ

CoverLogo
221 Views

ဝါးတရာစက်မှုဇုန်  J-Land Myanmar အထည်ချုပ်စက်ရုံက ဒေးကြေးတိုးမြှင့် သတ်မှတ်ပေးခဲ့ပေမဲ့ အစိုးရ ညွှန်ကြားချက်အရဆိုပြီး ပြန်လည်လျှော့ချ ပိုင်းခြားသတ်မှတ် ပေးလို့ အလုပ်သမားတွေမှာ ရပိုင်ခွင့်နဲ့ ပတ်သက်ပြီး စိုးရိမ်မှုတွေရှိနေတယ်လို့ ပြောပါတယ်။ 

“ ပြီးခဲ့ မေလကတည်းက သတ်မှတ်ပြီးသား၊ တိုးပေးတဲ့ လုပ်ခလစာကိုလည်း အဲ့လမှာပဲ စပြီးပေးခဲ့တယ်။ ဒါကို အစိုးရက သတ်မှတ်ထားတဲ့ အနည်းဆုံးလုပ်ခကို ကျော်လွန်မပေးဖို့ ညွှန်ကြားထားလို့ဆိုပြီး၊ စက်ရုံဘက်က တိုးပေးထားတဲ့ ဒေးကြေးကို မူလအတိုင်း ၄၈၀၀ ပေးမယ်ဆိုပြီး အလုပ်သမားတွေကို လက်မှတ် ထိုးခိုင်းတယ်။” လို့   အလုပ်သမားတဦးက ရှင်းပြပါတယ်။ 

တရက်လုပ်အားခကို လက်ရှိ သတ်မှတ်ပမာဏထက်ပိုပေးတာက ဥပဒေကို ဖောက်ဖျက်တာမဟုတ်ဘဲ အနည်းဆုံးအခကြေးငွေ ဥပဒေ အခန်း ၇ (အလုပ်ရှင်၏ တာဝန်များ) ပုဒ်မ ၁၂ (ခ)မှာ “ ဥပဒေအရ သတ်မှတ် ထားသော အနည်းဆုံး အခကြေးငွေထက် ပို၍ ပေးနိုင်သည်” လို့ သတ်မှတ်ပြဌာန်းထားပါတယ်။ 

ဇူလိုင်လအစမှာ စက်ရုံဘက်က ဒေကြေးလျှော့ချတာကို လက်ခံတဲ့ လက်မှတ်ထိုးခိုင်းခဲ့ပြီး စက်ချုပ် အလုပ်သမားတွေကတော့ လက်မှတ်ထိုးတာ မရှိခဲ့ဘူးလို့ သိရပါတယ်။ အလုပ်သမားတွေကို စက်ရုံဘက်က ကျွမ်းကျင် အဆင့် အလိုက် ဒေးကြေးကို ၅၈၀၀ ကနေ ၇၅၀၀ အထိပေးချေနေတာလို့ ဆိုပါတယ်။ ဒီလိုပေးချေနေရာကနေ အစိုးရရဲ့ ညွှန်ကြားချက်အရဆိုပြီး  ဒေးကြေးကို ၄၈၀၀ အထိ ပြန်လည်လျှော့ချပြီး ပိုတဲ့လစာကိုတော့ ထောက်ပံကြေးလို့ သတ်မှတ်ထားတယ်လို့ အလုပ်သမားတွေက ပြောပါတယ်။

“ဒေးကြေးကိုလည်း ထောက်ပံကြေးဆိုပြီး(တိုင်)တွေခွဲတယ်။ အိုတီမှာလည်း အဲလို ခွဲလိုက်တယ်။ ဒီလို ခွဲတာကို အလုပ်သမားတွေက မယုံကြဘူး။ စက်ရုံကလည်း ရက်မှန်ကြေး ၄၀၀၀၀ ကို အဲလို တိုင်တွေ ခွဲလိုက်တာ အခုဆို ၅၀၀၀/ ၁၀၀၀၀ ပဲ ရတော့တယ်။ အလုပ်သမားတွေက အဲလို ဖြစ်မှာ စိုးရိမ်တာ” လို့ အလုပ်သမားတဦးက ပြောပါတယ်။

ဒေကြေးတွေတိုးမြှင့်ပေးပြီးနောက် ထောက်ပံကြေးဆိုပြီး ပြောင်းလဲသတ်မှတ်တာမျိုး ပြီးခဲ့တဲ့လအတွင်းက ရွှေပြည်သာစက်မှုဇုန်က KINGSRICH (MYANMAR) FASHION CO,LTD Garment မှာလည်း ဖြစ်ပွားခဲ့ပါတယ်။ ဒါ့အပြင် လုပ်ငန်းလစာ တိုးပေးတဲ့အကြောင့် လူမှုကွန်ရက်မှာ ထုတ်ပြန်ခဲ့တဲ့ လုပ်ငန်းရှင်တွေကို စစ်ကောင်စီ က ဖမ်းဆီး တရားစွဲတာတွေလည်း ပြီးခဲ့တဲ့ ဇွန်လထဲမှာ ပြုလုပ်ခဲ့ပါတယ်။ 

ဒေကြေးပိုင်းခြား(တိုင်ခွဲ)ပေးတာကို စက်ရုံဘက်က WCC အဖွဲ့ဝင်တွေ သေချာညှိနှိုင်း ပြီးဆောင်ရွက်ပေးဖို့ လိုတယ်လို့ အလုပ်သမားအရေးလှုပ်ရှားသူ မမာမာအေး(အမည်လွှဲ)က အခုလို ပြောပါတယ်။ 

“WCC အဖွဲ့နဲ့ သေချာ အာမခံပြီး သေချာလုပ်ထားမယ်ဆိုရင် ပြဿနာတော့  မရှိနိုင်ဘူး။ လက်ရှိက အလုပ်ရှင်  တွေကလည်း လက်တလော ဖြစ်နေတဲ့ ပြဿနာတွေကြောင့် တိုင်တွေ ခွဲပေးလိုက်တာမျိုး ဖြစ်နိုင်တယ်။ ဒါပေမဲ့ အလုပ်သမားတွေ သတ်မှတ်ရရှိထားတဲ့ ငွေကြေးတွေကို လျှော့ပေးတာတို့၊ လျော့သွားတာမျိုးတော့ လက်ခံလို့ မရဘူး” လို့ ပြောပါတယ်။ 

J-Land Myanmar အထည်ချုပ်စက်ရုံ ကို ကိုရီးယားနိုင်ငံသားတဦးပိုင်ဆိုင်ပြီး စက်လိုင်း ၇ လိုင်းနဲ့ လုပ်သား တစ်ထောင်ဝန်းကျင် လုပ်ကိုင်နေတယ်လို့ သိရပါတယ်။ စက်ရုံအတွင်း WCC အဖွဲ့ ဖွဲ့စည်းထားပြီး စက်ရုံအလုပ်သမားသမဂ္ဂတော့ ဖွဲ့စည်းထားတာမရှိဘူးလို့ အလုပ်သမားတွေက ပြောဆိုထားပါတယ်။


Related posts

Cover
ဒေးကြေးနဲ့အချိန်ပိုကြေးတွေတိုးပေးဖို့ အလုပ်သမားတွေ ဆန္ဒဖော်ထုတ်
Jul 12, 2024
Cover
Heng Li Garment စက်ရုံအလုပ်သမားတွေ နားရက်မရှိလုပ်ကိုင်နေရပြီး အခွင့်အရေးချိုးဖောက်ခံရမှုများရှိနေ
Jul 11, 2024
Cover
JOC Myanmar Knitwear အထည်ချုပ်စက်ရုံအလုပ်သမားတွေ ဒေးကြေးတိုးပေးဖို့တောင်းဆို၊ အလုပ်သမား ၂ ဦးအလုပ်ထုတ်ခံရ
Jul 11, 2024
Cover
လူမှုဖူလုံရေးအကျုံးဝင်အလုပ်သမားများ မိမိတို့ရဲ့ဖူလုံရေးအထောက်အပံ့ရပိုင်ခွင့်တွေအပေါ် ပိုမိုသိရှိရန်လိုအပ်နေသေး
Jul 11, 2024
Cover
အခြေခံအလုပ်သမားတွေ ဆိုင်ဖျော်လဘက်ရည်တခွက် သောက်နိုင်ဖို့ အလှမ်းဝေးလာ
Jul 10, 2024
Cover
pepsi အချိုရည် ကုမ္ပဏီကိုထပ်တိုးတရားစွဲဆိုမှု ၁၈ ရက်နေ့သို့ပြန်လည်ချိန်းဆို
Jul 10, 2024
Cover
Wonderful Apparel အထည်ချုပ် အလုပ်သမားတွေ အခွင့်အရေးချိုးဖောက်ခံနေရ
Jul 09, 2024