လုပ်ငန်းခွင်အတွင်းမှာ ထိခိုက်မှုတွေဖြစ်ပေါ်ပါက တာဝန်ယူဖြေရှင်းပေးတာမရှိလို့ အလုပ်ရှင်ဘက်ကနေ တာဝန်ယူပေးစေလိုတယ်လို့ MYANMAR Dixinda GARMENT CO,LTD စက်ရုံအလုပ်သမားတွေကပြောပါတယ်။
ရန်ကုန်တိုင်း လှိုင်သာယာမြို့နယ် အနော်ရထာစက်မှုဇုန် ပဒံရပ်ကွက် မှာ အလုပ်သမားအင်အား ၆၀၀ ကျော်နဲ့လည်ပတ်နေတဲ့ စက်ရုံမှာ လုပ်ငန်းခွင်အတွင်း ထိခိုက်မှုတစ်စုံတစ်ရာ ဖြစ်ပွားပါက အလုပ်ရှင်ဘက်ကတာဝန်ယူပေးတာမရှိတာ ခွင့်ခံစားခွင့်မရတာ လူမှုဖူလုံရေးခွင့်တွေမရရှိတာတွေဖြစ်ပေါ်ခံစားနေရတယ်လို့ အလုပ်သမားတွေကပြောပါတယ်။
လုပ်ငန်းခွင်ထဲမှာ အလုပ်သမားသမဂ္ဂဖွဲ့စည်းထားတာမရှိဘူးလို့ သိရပါတယ်။
ဒါ့အပြင် အဆိုပါလုပ်ငန်းခွင်မှာ FieldCore၊ AZUL၊ CORDURA အမှတ်တံဆိပ် ဆွဲသား အင်္ကျီ၊ ဘောင်းဘီတွေ ချုပ်လုပ်တာဖြစ်တယ်လို့ သိရပါတယ်။
"ဥပဒေပါ ခွင့်ခံစားခွင့် တွေဖြစ်တဲ့ ရှောင်တခင်ခွင့်တွေ ဆေးခွင့်တွေမရဘူးပေါ့နော် နေမကောင်းလို့ အလုပ်တစ်ရက်ပျက်ရင် ဒေးကြေး ၄၈၀၀ ကျပ်နဲ့ ရက်မှန်ကြေး ၅၀၀၀ ဖြတ်တောက်ခံရတယ်"လို့ အလုပ်သမားတစ်ဦးက ပြောဆိုပါတယ်။
လူမှုဖူလုံရေးကြေးပေးသွင်းရပြီး ဆေးခွင့်ယူပါက ရက်မှန်ကြေး ဒေးကြေး စတာတွေ ဖြတ်တောက်ခံရပြီး ကိုယ်ဝန်ဆောင်အလုပ်သမားတွေကို လုပ်သက် ၆ လအထိ ဉပဒေပါ ခွင့်ခံစားခွင့်တွေ မပေးဘူးလို့ သိရပါတယ်။
ဆက်လက်ပြီးတော့ လုပ်ငန်းခွင်ထဲမှာ ထိခိုက်မှုတွေ ဖြစ်ပွားပါ အလုပ်ရှင်ဘက်က တာဝန်ယူမှုမရှိဘဲ အလုပ်သမားက ကိုယ့်နည်းလမ်းဖြင့်သာဖြေရှင်းရခြင်း EC စာချုပ်ချုပ်ဆိုထားပြီး စာချုပ်ပါ အချက်အလက်များနှင့် ကွဲလွဲသည့် စည်းကမ်းချက်များချမှတ်ကာ တစ်ဖက်သတ် ချမှတ်လုပ်ဆောင်နေတာရှိနေတယ်လို့ လည်း အလုပ်သမားတွေထံကသိရပါတယ်။
" အလုပ်ထဲမှာ ယောက်ကျားလေးတွေ ပုဆိုးမဝတ်ရဘူးလို့ စည်းကမ်းထုတ်ထားတယ် ပုဆိုးမဝတ်ရရင် ယူနီဖောင်း ထုတ်ပေးဆိုတော့လဲ မထုတ်ပေးဘူး အမြဲတမ်းချည်း ဘောင်းဘီဝတ်ဖို့ကျတော့ အဆင်မပြေဘူးလေ ဝတ်စေချင်ရင် ယူနီဖောင်းထုတ်ပေးတာမျိုးလုပ်ရမှာ မလုပ်ပေးဘဲ ကိုယ့်အစီအစဉ်နဲ့ကိုယ်ဝတ်ခိုင်းနေတာ" လို့ ကျေနပ်မှုမရှိတဲ့အလုပ်သမားက ပြောဆိုပါတယ်။
အလုပ်ရှင်အနေနဲ့ အလုပ်သမားတွေကို လုပ်ငန်းခွင်အတွင်းမှာ ဉပဒေပါ ခံစားခွင့်တွေပေးဖို့ လုပ်ငန်းခွင်ထိခိုက်တာတွေကို တာဝန်ယူဖြေရှင်းပေးဖို့ ချုပ်ဆိုထားသော ECစာချုပ်အတိုင်း လုပ်ဆောင်ရန်၊ စည်းကမ်းချက်များ တစ်ဖက်သတ်မချမှတ်ရန်တောင်းဆိုလိုတယ်လို့ ဆိုပါတယ်။
#MyanmarLabourNews
