မတ်လအတွက်လုပ်ခလာစာမရှင်းပေးတဲ့အတွက်ရန်ကုန်တိုင်း လှိုင်သာယာမြို့နယ် ရွှေလင်ဗန်းစက်မှု့ဇုန်အထဲက တရုတ်လူမျိုးပိုင်ဆိုင်တဲ့ကျားဖြူ(CSG) အထည်ချုပ်စက်ရုံကအလုပ်သမားတွေကယမန်နေ့က စက်ရုံတွင်းဆန္ဒထုတ်ဖော်ခဲ့ကြတယ်လို့သိရပါတယ်။
"လစာကို ၅ ရက်နေ့ထုတ်ပေးရမှာကိုထုတ်မပေးဘူး ၇ ရက်နေ့ပြန်ချိန်းတယ် ၇ ရက်နေ့ရောက်တော့လဲ ၈ ရက်နေ့ဆိုပြီးပြန်ချိန်းတယ် အဲ့ဒါကိုဝန်ထမ်းတွေကလက်မခံတာ"လို့အဆိုပါစက်ရုံအလုပ်သမားတဦးက MLN ကိုပြောပါတယ်။
ယမန်နေ့အလုပ်ဆင်းချိန်လောက်ကစပြီးလုပ်အားခမရရှိတဲ့အလုပ်သမားတွေဟာ စုပေါင်းဆန္ဒပြနေကြပြီးတော့ည၈နာရီကျော်လောက်မှာပဲစက်ရုံထဲကိုစစ်ကောင်စီတပ်သားတွေဝင်ရောက်လာခဲ့တယ်လို့သိရပါတယ်။
"ဒီနေ့ထုတ်ပေးမယ် ညက၀န်ထမ်းတွေအိမ်မပြန်ဘဲနေတယ်ပြောတယ်၊ ရုံ ၁ နဲ့ ၂ စုစုပေါင်း ၁၀၀၀ လောက်ရှိတယ်။ရုံ ၂ ကလူနည်းစုမို့ လစာထုတ်ပေးပါတယ်။ အခုတော့ ရုံ ၁ အတွက်ဒီနေ့ထုတ်ပေးမယ်ပြောလို့စောင့်နေကြပါတယ် ၃ နာရီ ထုတ်ပေးမယ်လို့ သိရတယ်" လို့ စက်ရုံလုပ်သားတစ်ဦးက Myanmar Labour News ကိုပြောပါတယ်။
ယခုလက်ရှိအချိန်မှာစက်ရုံတွေဖက်ကလုပ်သားတွေရဲ့လုပ်ခလစာမပေးချေတာတွေ၊ လုပ်သားအခွင့်အရေးဥပဒေမဲ့ချိုးဖောက်တာတွေကြောင့်အလုပ်သမားတွေဖက်ကဥပဒေပါအခွင့်အရေး၊ လူမှု့ဖူလုံရေးအကျိုးခံစားခွင့်တွေရရှိဖို့မကြာခဏဆိုသလိုစက်ရုံတွင်းဆန္ဒပြတောင်းဆိုတာတွေရှိနေသလိုအလုပ်ရှင်တွေဖက်ကစစ်တပ်နဲ့ ခြိမ်းခြောက်နေတာတွေလဲရှိနေပါတယ်။