တရုတ်နိုင်ငံ ယူနန်ပြည်နယ် တယ်ဟုန်ခရိုင် ရွှေလီမြို့ မှာဖွင့်လှစ်ထားတဲ့ HY ဟွေ့ရင်အထည်ချုပ် စက်ရုံမှာ မြန်မာအလုပ်သမား ၃၀၀ ကျော်နဲ့ Travel အမှတ်တံဆိပ်အထည်တွေချုပ်လုပ်နေပြီး နားရက်မပေးဘဲ ခိုင်းစေနေလို့ အလုပ်သမားတွေက မြန်မာနိုင်ငံ ကုန်ထုတ်နှင့် စက်မှုလက်မှုအလုပ်သမားများအဖွဲ့ချုပ် IWFM ကို အကူအညီတောင်းခံထားပါတယ်။
"အထည်စံချိန် မတရားတောင်းတယ်၊ လူ ၃၀ ရှိတဲ့ စက်လိုင်းကို လိုင်းပေါက်အထည် တနာရီကို ၁၀၀ တောင်းတယ် ၊ တနေ့တာတောင်းတဲ့အထည်စံချိန်မပြည့်ရင် အလုပ်ပိတ်ရက်တွေ ရော ညဘက် အောလင်း အောနိုက် အချိန်ပိုကို အလကားဆင်းပေးရပါတယ်၊ ပိတ်ရက် ကို တလမှာ ၁၊၉၊၁၆၊၂၃ ဆိုပြီးသတ်မှတ်ပေးထားတယ်၊ အဲ့ရက်တွေတခါမှမနားရဘူး အချိန်ပို ဆင်းပေးရတယ်၊ မဆင်းရင် အောစူပါ စူပါတွေက ဆဲဆိုပြီးဆင်းခိုင်း်တယ်။ မဆင်းရင် အငြိုးအတေးထားပြီး အထည်ပိုတောင်းခံရတယ်"လို့ အလုပ်သမားကပြောပါတယ်။
အခုလို နားရက်မရှိဘဲ အချိန်ကြာမြင့်စွာ အလုပ်လုပ်ကိုင်ရတာကြောင့် ကျန်းမာရေးထိခိုက်လာတာတွေရှိတယ်လို့ ဆိုပါတယ်။
နေမကောင်းဖြစ်ပြီး အလုပ်နားပါက နားရက်အတွက် ငွေကြေး ဖြတ်တောက်ခ့ရတယ်လို့ ပြောပါတယ်။ ဒါ့အပြင် စက်ရုံမပြင်ထွက်ခွင့်မပေးတာကြောင့် အမျိုးသမီးအသုံးအဆောင်ပစ္စည်းနဲ့ ဆေးဝါးတွေ ဝယ်ဖို့ အခက်အခဲဖြစ်ပေါ်နေတာကြောင့် ကူညီဖြေရှင်းပေးဖို့ အလုပ်သမားတွေကအကူအညီတောင်းထားပါတယ်။
အလုပ်သမားတွေအနေနဲ့ အောက်ပါ အချက်တွေကို ဖြေရှင်းပေးဖို့ အကူအညီတောင်းခံထားပြီး တောင်းဆိုချက်တွေကတော့
၁။ အလုပ်ရှင်ဘက်မှ အလုပ်သမားများချုပ်လုပ်နိုင်သော အထည်စံချိန်ကိုသာတောင်းခံရန်။
၂။ အလုပ်ရှင်ဘက်က အောစူပါမှ စံချိန်တောင်းခံရာတွင် အော် ဟစ်ဆဲဆိုပြီးဆိုခြင်း မပြုလုပ်ရန်။
၃။ အလုပ်ရှင်ဘက်မှတောင်းခံသော အထည်စံချိန်မရလျင် အောလင်း၊ အောနိုက်အချိန်ပိုအိုတီ အလကား ဆင်းခိုင်းခြင်းမပြုလုပ်ရန်။
၄။ အလုပ်သမားများ အလုပ်ပိတ်ရက်ကို အချိန်ပိုအိုတီဆင်းခိုင်းခြင်းမပြုလုပ်ဘဲ အလုပ်ရှင်ဘက်မှ ပိတ်ရက် အနားပေးရန် ဖြစ်တယ်လို့ ဆိုပါတယ်။
