ရန်ကုန်တိုင်း လှိုင်သာယာမြို့နယ်၊ ရွှေလင်ဗန်းစက်မှု့ဇုန်၊ ဆိပ်ကမ်းသာလမ်းပေါ်မှာလုပ်ကိုင်နေတဲ့ တရုတ်နိုင်ငံသားပိုင် TANJINFASHION MILES TONE အထည်ချုပ်စက်ရုံက အလုပ်သမားတွေကို တနဂ်နွေနေ့တိုင်း နေ့တစ်ဝက်အလုပ်ဆင်းခိုင်းပြီး အလုပ်သမားတွေကိုလုပ်အားခအချိန်ပိုကြေးမရှင်းပေးဘူး လို့နစ်နာသူအလုပ်သမားတွေရဲ့ပြောကြားချက်အရသိရပါတယ်။
အလုပ်သမား ၁၀၀၀ ဝန်းကျင်လောက်နဲ့လည်ပတ်လုပ်ကိုင်နေတဲ့ စက်ရုံဖြစ်ပြီးတော့အလုပ်သမားတွေအနေနဲ့တရားဝင်ရုံးပိတ်ရက်နဲ့ရှောင်တခင် ခွင့်ရက်ခံစားခွင့်တွေမရရှိဘူးလို့လည်းသိရပါတယ်။
"ခုကတနဂ်နွေနေ့တိုင်းနေ့တဝက်ခေါ်ပြီး အလကားပဲတင်းခိုင်းနေတာ တစ်လိုင်းကို ၁၅ ယောက်နဲ့အယောက် ၂၀ ကြားဆင်းပေးနေရတယ် မန်နေဂျာကလဲတရုတ် အကုန်တရုတ်ကြီးပဲ"လို့နစ်နာသူအလုပ်သမားတဦးက MLN ကိုပြောပါတယ်။
အဆိုပါစက်ရုံဟာအလုပ်သမားတွေအပေါ်လစဥ်လူမှု့ဖူလုံရေးကြေး ၂၈၈၀ ကျပ်နှုန်းဖြတ်တောက်နေပေမယ့် အလုပ်သမားတွေအနေနဲ့လူမှု့ဖူလုံရေးခံစားခွင့်အပြည့်အဝမရရှိတဲ့အပြင် ခွင့်တစ်ရက်ပျက်ရင် သုံးသောင်းကျပ် လောက်အထိဖြတ်တောက်ခံရတယ်လို့အလုပ်သမားတွေဖက်ကပြောပါတယ်။
"ထားပါတော့ ကျမတို့ကရုံးလာနေတဲ့အချိန်အိမ်မှာအရေးပေါ်ဖြစ်လို့ပြန်ရတဲ့အခါရှိတယ် အဲ့ဒါမျိုးလဲသူတို့ကမပေးဘူး ရှောင်တခင်ခွင့်ပါဆို ရှောင်တခင်ခွင့်ကိုမန်နေဂျာ တရုတ်မကခွင့်တင်ခိုင်းတယ်ဆေးခွင့်လဲဖြတ်တယ် တစ်ရက်ပျက်တာနဲ့ဒေးကြေး၊ ဂရိတ်ကြေး၊အကုန်ဖြတ်တာ ပြီးတော့နှစ်ကြေးလဲအပြည့်မရဘူး နှစ်သောင်းကျော်ပဲရတယ် လူမှု့ဖူလုံရေးကြေးကဖြတ်သာဖြတ် ဘာမှခံစားခွင့်မရဘူး"လို့အဆိုပါအထည်ချုပ်စက်ရုံမှ အလုပ်သမတဦးကဆက်ပြောပါတယ်။
အခုလို TANJINFASHION MILES TONE အထည်ချုပ်စက်ရုံဖက်က အလုပ်စဝင်တဲ့သူတွေကိုကျွမ်းကျင်ကြေးမပေးတာတွေ အလုပ်သမားတွေအပေါ်နည်းမျိုးစုံနဲ့ဥပဒေမဲ့လုပ်အားခဖြတ်တောက်တာတွေ၊ အိုတီမဆင်းမနေရလုပ်ခိုင်းတာတွေအပါအဝင် အခြားသောလုပ်ငန်းခွင် ဖိနှိပ်မှု့တွေလဲရှိနေသေးတယ်လို့အလုပ်သမားတွေကပြောပါတယ်။
"သောက်တဲ့ရေတွေကလဲဝါလို့သွားတော့ပြောထားတယ် တနဂ်နွေနေ့ဆင်းခိုင်းပြီး အိုတီကြေးမပေးလို့သွားပြောတဲ့ အလုပ်သမားတစ်ယောက်လဲအလုပ်ထုတ်ခံလိုက်ရတယ် အိုတီကလဲအကြောင်းပြချက်မျိုးစုံပေးပြီးဆင်းခိုင်းနေတာ"လို့အလုပ်သမားတွေဖက်ကပြောပါတယ်။
အခုလိုအလုပ်သမားအခွင့်အရေးချိုးဖောက်မှု့တွေကိုအလုပ်သမားတွေဖက်ကဖြေရှင်းပေးဖို့လိုလားနေကြပြီး ဝင်ရောက်ညှိနှိုင်းပေးမယ့်စက်ရုံသမဂ္ဂမရှိတဲ့အတွက်အခက်တွေ့နေကြရတာလို့အလုပ်သမားတွေဖက်ကပြောပါတယ်။
လက်ရှိစက်ရုံဖက်ကဖွဲ့ပေးထားတဲ့ အလုပ်သမားကော်မတီရှိပေမယ့် စက်ရုံဖက်ကသူတို့လက်ဝေခံလူတွေနဲ့သာဖွဲ့စည်းထားတာဖြစ်လို့ အလုပ်သမားအရေးကိုတစ်ခုမှကူညီဖြေရှင်းပေးတာမျိုးမရှိဘူးလို့အလုပ်သမားတွေရဲ့ပြောကြားချက်အရသိရပါတယ်။
TANJINFASHION MILES TONE အထည်ချုပ်စက်ရုံဟာ လည်သာဂျက်ကက်၊အနွေးထည်၊ ဘောင်းဘီ၊ အက်ျီတွေချုပ်လုပ်နေတဲ့စက်ရုံတစ်ရုံဖြစ်ပြီး Zara၊ Only အစရှိတဲ့အမှတ်တံဆိပ်တွေကိုအဓိကထားချုပ်လုပ်ပြီးစျေးကွက်ထဲကိုတင်ပို့နေတာဖြစ်တယ်လို့လဲသိရပါတယ်။
