ထိုင်းအစိုးရက လက်ရှိ တရားဝင် နယ်စပ်ဖြတ်သန်းခွင့် မပေးထားသေးသလို အင်တာနက်အွန်လိုင်းပေါ်မှာ တာဝန်ယူ ပို့ဆောင်ပေးမည်ဆိုတဲ့ ကြော်ငြာအတုတွေကြောင့် ထိုင်းရောက် မြန်မာရွှေ့ပြောင်းအလုပ်သမားအနေနဲ့ သင်္ကြန်ကာလကို နေရပ်ပြန်တာတွေကို မပြုလုပ်ဖို့ အလုပ်သမားအရေး ဆောင်ရွက်သူတွေက သတိပေး နှိုးဆော်ထားတယ်လို့ သိရပါတယ်။
လူမှုကွန်ရက်စာမျက်နှာမှာ နေအိမ်ပြန်လိုတဲ့ မြန်မာရွှေ့ပြောင်းအလုပ်သမားတွေကို နေအိမ်အရောက်လာကြိုပြီး ထိုင်း-မြန်မာ ချစ်ကြည်ရေး အမှတ် (၂) တံတားကနေ မြဝတီလိုင်းကားအပေါ်အထိ ချိတ်ဆက်ဆောင် ရွက်ပေးသွားမယ်ဆိုတဲ့ ကြော်ငြာတွေ ပျံနှံနေတဲ့အပေါ် မြန်မာပြည်သားများအရေး ပူးပေါင်းလှုပ်ရှားမှုကော်မတီ (JACBA) ဥက္ကဋ္ဌ ဦးမိုးကြိုးက အခုလို သတိပေးထားတာ ဖြစ်ပါတယ်။
မြန်မာဘက်အခြမ်း ပွဲစားတွေက ထိုင်းအာဏာပိုင်တွေနဲ့ ချိတ်ဆက်ပြီး မြန်မာအလုပ်သမားတွေအတွက် ကြီးမားတဲ့ ကုန်ကျစရိတ်ဖြစ်တဲ့ ဘတ် ၃၅၀၀ ကနေ ၁၀,၀၀၀ အထိ ပေးပြီး နေရပ်ပြန်တာမျိုး မဖြစ်စေဖို့ တရားဝင် နှစ်နိုင်ငံဂိတ်တွေ တရားဝင်ဖွင့်တဲ့အထိ သည်းခံ စောင့်ဆိုင်းဖို့လိုအပ်တယ်လို့ အကြံပြုထားတာ ဖြစ်ပါတယ်။
ထိုင်းနိုင်ငံဘက်ခြမ်းမှာလည်း သင်္ကြန်ကာလအတွင်း ထိုင်းအာဏာပိုင်တွေက ဥပဒေကို အမျိုးမျိုး ပြုလုပ်ထားသလို ပွဲစားတွေကလည်း ငွေကြေးလိမ်လည်မှုတွေ ပြုလုပ်နိုင်တဲ့ အပြင် မြန်မာ နယ်စပ်တိုက်ပွဲတွေနဲ့လည်း ကြုံတွေ့ ရနိုင်တယ်လို့ (JACBA)က သတိပေးထားတာ ဖြစ်ပါတယ် ။
ဒါအပြင် မြန်မာရွှေ့ပြောင်းအလုပ်သမား ခရီးသည်တွေကို အဓိက ပို့ဆောင်ပေးနေတဲ့ ဘန်ကောက်-မြဝတီ ကားသမားတွေက ဧပြီလ ၈ ရက်ကနေ ၁၁ ရက်နေ့အထိ အိမ်ပြန်လို့ရတယ်ဆိုပြီး ပြောဆိုစည်းရုံးနေသလို တရားဝင် ကားတွေနဲ့ အကြိုအပို့ လုပ်ပေးနေတယ်လို့ Facebook လူမှုကွန်ရက်စာမျက်နှာမှာ ကြော်ငြာ ထား တာပါ။
ဒီအပြင် လက်ရှိ စစ်ကောင်စီကို တော်လှန်တိုက်ပွဲဝင်နေသူတွေကလည်း စစ်ကောင်စီကျင်းပမယ့် သင်္ကြန် ပွဲတော်တွေအပါအဝင် အပျော်သင်္ကြန်တွေမှာ မပါဝင်ဘဲ တော်လှန်သင်္ကြန်အနေနဲ့ ပါဝင်ကြဖို့ကို စစ်အာဏာရှင် အမြစ်ဖြတ် တော်လှန်းရေးအဖွဲ့က လူမှုကွန် ရက် စာမျက်နာမှာ တိုက်တွန်း ထားပါတယ်။
လက်ရှိ ထိုင်း-မြန်မာနယ်စပ် မြဝတီ-ကောကရိတ် အာရှလမ်းမှာလည်း စစ်ကောင်စီနဲ့ ကရင်အမျိုးသား လွတ်မြောက်ရေး တပ်မတော် -KNLA နဲ့ စစ်ကောင်စီ နဲ့ ပူးပေါင်းတပ်ဖြစ်တဲ့ BGF တပ်တွေနဲ့ နှစ်ဖက် တိုက်ပွဲ ပြင်းထန် နေတာကြောင့် ခရီးသွား ပြည်သူတွေကို မတ်လ ၂၇ ရက်နေ့ကစပြီ အာရှလမ်းမကြီးကို အသုံးပြု သွားလာ မပြုလုပ်ဖို့ ကရင်အမျိုးသားများအစည်းအရုံး (KNU ) က မေတ္တာရပ်ခံထားတယ်လို့ သိရပါတယ်။
ထိုင်းအစိုးရကလည်း ပြီးခဲ့တဲ့ (၂) နှစ် အတွင်း ကိုဗစ်ကပ်ရောဂါ ထိန်းချုပ်ရေးအတွက် နယ်မြေကျော်လွန် ခရီးသွားလာတာတွေကို တားမြစ်ထားသလို နှစ်နိုင်ငံ ချစ်ကြည်ရေး တံတားကို တရားဝင် ဖွင့်လှစ်ထားတာ မရှိသေးတဲ့အပြင် သင်္ကြန်ကာလမှာလည်း ရေပက်ကစားတာကို ကန့်သတ်ထုတ်ပြန်ထားတယ်လို့ သိရပါတယ်။
