ပြည်တွင်းရွှေဈေးနှုန်းတွေ စံချိန်တင်အထိတစ်ရှိန်ထိုးမြင့်တက်လာတာကြောင့် ရွှေဒင်္ဂါးပြားတွေကို ရောင်းချပေးဖို့ စီစဉ်နေတာဟာ  ရွှေဈေးမြင့်တက်မှုကိုအတိုင်းအတာတစ်ခုအထိ ထိန်းချုပ်ဖို့ မအောင်မြင်နိုင်ဘူးလို့ သုံးသပ်မှုတွေရှိနေပါတယ်။

"ရွှေဈေးထိန်းချုပ်ဖို့အတွက်သူတို့လုပ်နေတာ။ အကယ်ဒမီရွှေနဲ့ဒေါ်လာကိုပါလာအောင်လုပ်တာ။  နားမလည်တဲ့သူ ညံ့တဲ့သူကတော့ ခံရမှာပဲ။ ရွှေဒဂါးကအရည်အသွေးမမီတာတွေထုတ်မှာ။ ညံ့ရင်ခံအုံးပဲ။ 
ဒင်္ဂါးထုတ်ပြီးငွေကြေးထိန်းတာက ထင်သလောက်တော့မအောင်နိုင်ဘူး။ ဒေါ်လာဈေးကတော့ ခုညအထိ ၃၀၀၀ နဲ့ ၃၀၀၀ အောက်ကိုဆင်းနေတယ် ဒါပေမဲ့အရောင်းအ၀ယ်မရှိ ငြိမ်နေတယ်။ ၄၀၀၀ အထက်၀ယ်စုပြီး ပိုက်ဘောမိနေကြတာကများမယ်။ ဒါကလည်းခဏပဲလို့ထင်ပါတယ်။  ရေရှည်ထိန်းနိုင်မယ်မထင်ပါဘူး။ ရွှေဈေးကလည်းမနေ့ကကျတယ် ဒီနေ့တော့ သိန်း၃၀တန်းကိုပြန်ရောက်တာပါပဲ ရောင်းအေး၀ယ်အေးပေါ့"လို့  ရွှေဈေးကွက်မှ  လုပ်ငန်းရှင်တစ်ဦးကဆိုပါတယ်။

စစ်ကောင်စီလက်အောက်ခံ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနကနေ တစ်ကျပ်သား၊ ငါးမူးသားနဲ့ တစ်မတ်သား အလေးချိန်ရှိတဲ့ ရွှေဒင်္ဂါးပြားတွေကိုကမ္ဘာ့ပေါက်ဈေးအတိုင်း စစ်ကောင်စီက မကြာခင်မှာ ရောင်းချပေးပါတော့မယ်။

အဆိုပါ ရွှေဒင်္ဂါးပြားတွေ ရောင်းချပေးမှုကို ကိုဗစ်ကာလကတည်းက ပိတ်ထားခဲ့တာဖြစ်ပြီး အခုလ စက်တင်ဘာလမှာ ပထမဆုံးအကြိမ် ကမ္ဘာ့ပေါက်ဈေးအတိုင်း သက်သာတဲ့ ဈေးနှုန်းနဲ့ ရောင်းချပေးမယ်လို့ စစ်ကောင်စီက စက်တင်ဘာ ၁ ရက်က ကြေညာလိုက်တာဖြစ်ပါတယ်။

ဒါဟာ ဝန်ကြီးဌာနအောက် သတ္တုတွင်းတွေ ရွှေလုပ်ကွက်တွေကနေ ရရှိတဲ့အခွန်တွေကနေပဲ လုပ်ဆောင်တာဖြစ်ပြီး  ရွှေဈေးတက်တာတွေကို ထိန်းနိုင်ဖို့မျှော်လင့်ထားတယ်လို့ဆိုထားပြီး ရွှေဒင်္ဂါးပြားတွေကို ဘယ်နေ့ဘယ်ရက်မှာ ဘယ်ဈေးနှုန်းနဲ့ ဘယ်လိုရောင်းချမယ်ဆိုတာကိုတော့ အသေးစိတ်ကြေညာသွားတာမရှိပါဘူး။

လက်ရှိမြန်မာ့ရွှေဈေးဟာ ကမ္ဘာ့ရွှေဈေးထက် မြင့်တက်နေတာဖြစ်ပါတယ်။ ရန်ကုန်ရွှေလုပ်ငန်းရှင်များအသင်းရဲ့ စက်တင်ဘာ ၂ ရက်နေ့ အကယ်ဒမီ မီးလင်းရွှေဈေးက တစ်ကျပ်သားကို မြန်မာငွေ ကျပ် ၁၉ သိန်း ကိုးသောင်းကျော် (၁,၉၉၈,၀၀၀) သာရှိပြီး ပြင်ပ ပေါက်ဈေးက သိန်း ၃၀ ကျော်နဲ့  ဈေးပိတ်ခဲ့ပါတယ်။ ကိုယ်တိုင် ရွှေတုံးပြန်လည်ရောင်းချခဲ့သူကတော့  ကျပ် ၂၇ သိန်းသာရရှိခဲ့တယ်လို့ ပြောပါတယ်။

အန်အယ်လ်ဒီအစိုးရလက်ထက်မှာတော့ ငါးမူးသားရွှေဒင်္ဂါးကို အမျိုးသားခေါင်းဆောင်ကြီး ဗိုလ်ချုပ်အောင်ဆန်းရဲ့ရုပ်ပုံပါတဲ့ ပုံစံအသစ်နဲ့ ပြောင်းလဲထုတ်လုပ်ရောင်းချခဲ့ပါသေးတယ်။

MyanmarLabourNews