တောင်ကိုရီးယားသို့ သွားရောက်လုပ်ကိုင်ရန် ဖြေဆိုရမည့် ကိုရီးယားအလုပ်အကိုင်(EPS)စာမေးပွဲ ဖြေဆိုမယ့်သူများဟာ စာမေးပွဲမှတ်ပုံတင်ကြေးပေးသွင်းဖို့ ဒေါ်လာ၀ယ်ယူရာမှာ အခက်အခဲနေတာကြောင့် မူလပေါက်ဈေးထက်ပိုပေး၀ယ်ယူနေရတယ်လို့ သိရပါတယ်။
" စာမေးပွဲဖြေဆိုဖို့မှတ်ပုံတင်ကြေး ၂၄ဒေါ်လာကို အချိန်မီပေးသွင်းနိုင်ဖို့ကို ဒေါ်လာက ဝယ်ရခက်နေတော့ အချိန်မီမသွင်းနိုင်မှာစိုးလို့ ပင်လုံရှေ့မှာတင်ပဲ ရတဲ့ဈေးနဲ့၀ယ်ပြီးသွင်းတာတွေရှိတယ်။ ရောင်းနေကြတာ ၂၄၀၀ ကနေ သုံးထောင်အထိတောင်ပဲ ပေး၀ယ်နေကြတယ်။ များနေတာကြီးကို ပေး၀ယ်နေကြရတာ"လို့ မှတ်ပုံတင်ကြေးပေးသွင်းခဲ့တဲ့ အလုပ်သမားတစ်ဦးကဆိုပါတယ်။
EPS စာမေးပွဲဖြေဆိုမဲ့သူများအနေဖြင့် ဖြေဆိုခွင့်မှတ်ပုံတင်ကြေးအမေရိကန် ၂၄ဒေါ်လာကို အစိုးအေဂျင်စီထုတ်ပြန်ထားသည့်ရက်များအလိုက် ပေးသွင်းရတာဖြစ််ပြီး လက်ရှိအချိန်မှာလည်း အမေရိကန်ဒေါ်လာပြင်ပပေါက်ဈေးမြင့်တက်နေတဲ့အပြင် ဝယ်ယူရခက်ခဲနေရတာတွေကြောင့် အချိန်မီပေးသွင်းနိုင်ဖို့ တစ်ဒေါ်လာလျှင် ၂၄၀၀၊ ၂၅၀၀၊ ၂၆၀၀နှင့် ၂၈၀၀ အထိ ပေး၀ယ်နေရတယ်လို့သိရတာပါ။
လက်ရှိအချိန်မှာ တောင်ကိုးရီးယားစာမေးပွဲဖြေဆိုမယ့်သူများအနေဖြင့် ဒဂုံမြို့သစ်မြောက်ပိုင်း ပင်လုံခန်းမ၌ စာမေးပွဲမှတ်ပုံတင်ကြေးပေးသွင်းရန် ဒေါ်လာအပြိုင်ရှာဝယ်ယူနေကြရတယ်လို့လည်း သိရပါတယ်။ EPSစာမေးပွဲမှတ်ပုံတင်ကြေးကို ၂၄ဒေါ်လာနဲ့ကိုက်ညီတဲ့ မြန်မာငွေလက်ခံခြင်းမရှိဘဲ ဒေါ်လာငွေနဲ့ပဲလက်ခံနေတာလို့လည်း အလုပ်သမားတွေကဆိုပါတယ်။
အခုကျင်းပမယ့် EPSစာမေးပွဲကို ၀င်ရောက်ဖြေဆိုရန် ကုန်ထုတ်လုပ်ငန်းအတွက် ၂၂၆၇၁ဦး ဖောင်တင်ထားပြီး ဆောက်လုပ်ရေးလုပ်ငန်းအတွက် ၄၁၈၆ဦး စိုက်ပျိုးရေးနဲ့မွေးမြူရေးလုပ်ငန်းအတွက် ၃၁၅၂ဦး စုစုပေါင်း သုံးသောင်းခန့်လျှောက်လွှာတင်ထားပြီး လက်ရှိမှာ EPSစာမေးပွဲဖြေဆိုဖို့ မှတ်ပုံတင်ကြေးပေးသွင်းခွင့်ရထားသူ ဦးရေ ၁၃၀၀၀ ကျော်ရှိနေပြီလို့ POEA ရဲ့ထုတ်ပြန်ချက်တွေအရ သိရပါတယ်။